“Перзент” балалар үйінің басшысы Әмина қажы Әжібаева қол астындағы тәрбиеленушілерге дінді міндеттемейтінін мәлімдеді.

Бұл туралы ол журналист Жанар Байсемізге берген сұхбатында айтты, деп хабарлайды Caravan.kz медиа порталы.

Жетім балаларды бауырына басқан Әмина апа сұхбат барысында журналистің “Кішкентай қыздарға күштеп хиджаб кигізесіз бе?” деген сұрағына жауап берді.

”Күштеп орамал таққызбаймын. Қыздардың өздері де кимеймін деп айтпайды. Орамалды тағып жүрген өздеріне ұнайды. Қыздар 13 жасқа толған жоқ. Сондықтан намазға рұқсат бермеймін. Қазір намаз оқымайды. Ал ұлдардың барлығы оқиды. Жасқа қарамай оқи береді. Ешқандай дінге мәжбүрлемеймін. Мысалы, моншадан шыққанда бәрі шаштарын жайып жүреді. Шаш кебу керек қой, әйтпесе биттеп кетеді ғой”, — дейді ол.

Сондай-ақ Әмина Әжібаева мешіт құрылысына демеушілік жасаған жанның діни ағымына мән бермегенін де жасырмады.

”Мешіттің құрылысына көмектескен құпия демеуші атын айтпауды өтінді. Көбіне діндегі адамдар сауабымыз кеміп қалады деп өздерінің атын айтқызбайды. Маған келіп мешіт салып, әдемілеп жасап берсе, ол адамның вахабист пе, салафист пе, аферист пе не қылам оны?! Оған мән бермеймін. Салафит екенсің мешітті салма десем, мен кім боламын сонда. Мешіт қаңырап тұра ма? Ол Алла разылығы үшін болатын нәрсе”, — дейді ол.