Бүгін, 27 мамыр – қазақ әдебиеттану ғылымы мен мәдениетінің дамуына зор үлес қосқан көрнекті мемлекет және қоғам қайраткері, филология ғылымының докторы, профессор Мырзатай Жолдасбековтің туған күні. Ғалым биыл 87 жасқа толып отыр, деп жазады Egemen.kz.

Мырзатай Жолдасбеков – қазақ руханиятының дамуына өлшеусіз еңбек сіңірген тұлға. Ол 1937 жылы дүниеге келген. Филология ғылымының докторы, профессор, мемлекет және қоғам қайраткері ретінде ел дамуының әртүрлі салаларында белсенді қызмет атқарды.

Жолдасбековтің ғылыми-зерттеу жұмыстары қазақ әдебиетінің ең көне үлгілерінен бастау алады. Ол Жамбыл Жабаевтың ақындық мұрасын кең көлемде зерттеп, оның шығармашылығына жаңа ғылыми тұрғыдан баға берді. Сонымен қатар, Жамбылдың ақындық мектебін зерделеп, оның замандастары мен шәкірттерінің туындыларын жан-жақты саралады.

Ғалымның еңбегі тек әдебиетпен шектеліп қалған жоқ. Ол көне түркі дәуіріне тән Орхон-Енисей жазба ескерткіштерін зерттеп, сол мұраларды алғашқылардың бірі болып қазақ тіліне аударып, ғылыми айналымға енгізді. Бұл еңбектері арқылы ол түркі халықтарының ортақ мұрасына тың серпін беріп, қазақ филологиясы ғылымын жаңа деңгейге көтерді.

Оның бастамасымен «Бәйтерек» ұлттық дәстүрлер театры құрылып, қазақ халқының төл мәдениеті мен өнері насихатталды. Бұл жоба арқылы қазақтың салт-дәстүрі мен рухани құндылықтары жаңа сипатта көрерменге ұсынылды.

Қоғамдық қызметте де өзіндік орны бар тұлға ретінде түрлі мемлекеттік лауазымдарды абыроймен атқарды. Еліміздің мәдени және рухани өркендеуіне, ұлттық бірегейліктің нығаюына бағытталған бастамаларға әрдайым қолдау көрсетіп, белсене атсалысты. Ұлт руханияты мен ғылымының дамуына өлшеусіз үлес қосқан көрнекті тұлға – Мырзатай Жолдасбековтің туған күні – отандық ғылым мен мәдениет үшін маңызды дата.

Дамира Төлеген

ЕҰУ студенті