Қарағанды облысының үш ауданында қара шегіртке қаптады . Зиянкестер жайылым мен шабындықты жайпап, жасыл желекті баудай түсіріп жатыр, — деп хабарлайды Massaget.kz тілшісі "КТК" телеарнасына сілтеме жасап.

Тұрғындар жанайқайын айтты.

"Төрт күн бойы осы жерге техникаларын иірді де қойды. Енді неге ол жерге иіріп қойдыңыздар десем, "дәріні күттік, мердігер дәрі әкелген жоқ" дейді. Сонда бұл кісілер неменеге келген? Соғысқа оқсыз келген солдат сияқты", — деп ашынды Сағдат Күземханов.

Телеарна мәліметінше, қаптаған зиянкес "Италия шегірткесі" деп аталады. Мамандар әзірге соны анықтапты.

"Жасыл желекке қырғидай тиген зиянкестер жан-жағын отап бара жатыр. Бұлай жалғаса берсе, жайылымсыз қаламыз", — дейді ауыл тұрғындары.

Мамандар шегіртке облыстағы Қарқаралы, Шет және Ақтоғай аудандарына тарап жатқанын растады. Олардың айтуынша, биыл 59 мың гектар жерді улаймыз деген жоспары бар екен. Оған 184 миллион теңге қарастырылыпты. 9 техинака, 2 жеңіл ұшақ пен 4 агродрон дайын көрінеді. Бірақ дәрілеу әзірге басталмаған.

"Алдымен шегірткенің таралу аумағын анықтап алуымыз керек" — деп отыр олар.

Еске салайық, бұған дейін Қызылорда облысында шегіртке қаптауына байланысты жедел штаб құрылғаны хабарланды.

Қызықты жаңалықтар мен видеоларды көру үшін TikTok арнамызға жазылыңыз!