Биыл еліміздің басты құқықтық құжаты – Конституцияның қабылданғанына 30 жыл. 1995 жылғы 30 тамызда бүкілхалықтық референдум арқылы қабылданған бұл құжат тәуелсіз мемлекетіміздің саяси және құқықтық негізін қалап, демократиялық даму жолына бағыт берді. Ата Заң – еліміздің Тәуелсіздігін нығайтқан, азаматтардың құқығы мен бостандығын қамтамасыз еткен темірқазық құжат. Конституция – бұл жай ғана заңдар жиынтығы емес, ол мемлекет пен қоғам арасындағы келісім, бүкілхалықтық сенімнің көрінісі. Ата Заңымыз адамның өмірі, құқығы мен бостандығы ең жоғары құндылық екенін нақты бекітті. Бұл қағида бүгінде еліміздің барлық заңнамалық актілерінің өзегі десек болады.