Қостанай облысының Амангелді ауданында 600-ге жуық жеке кәсіпкер бар, деп хабарлайды 24kz.

Шағын және орта бизнестің дамуы бойынша бұл ауданға тең келетіндер некен-саяқ. Басқасын айтпағанда, Амангелді ауылының өз басында төрт наубайхана жұмыс істейді. Сонымен қатар Торғай өңірі бал татыған қымызымен де танымал. Қазір жергілікті кәсіпкерлер ұлттық сусынды Қазақстанның түкпір-түкпіріне жібереді.

Мағауия Қалиев, тілші:

- Құмкешу ауылының тұрғыны Дүйсенбек Мырзакеевтің 500-ге жуық жылқысы бар. Он бес жыл бұрын кәсібін бір-екі биеден бастаған. Бүгінде үйір саны 20-ға жуықтапты. Көктем айынан күздің қара суығына дейін күніне қырық шақты бие сауады.

Дүйсенбек Мырзекеев, кәсіпкер:

- Күніне енді 100 литрдің сыртында қымыз өндіріледі. 100 литрдей халыққа сатылады. Бұл қымыздар Қостанай, Жезқазған, Атырау жаққа кетеді. Қазір Қазақстанның бүкіл түкпір-түкпіріне кетіп жатыр. Шетелге де кетіп жатыр.

Байқағанымыз, шынымен бұл үйдің қымызына сұраныс жоғары екен. Біз болған бір жарым сағаттың ішінде бірнеше адам келіп, сатып алды.

Әрине, бәсекелестік бар. Бір Құмкешудің өзінде 5-6 отбасы бие байлап, қымыз ашытады. Сондықтан талғампыз тұтынушының көңілінен шығу үшін ұлттық сусынның дәмін келтіріп, баптай білудің маңызы зор.

Алтын Князева, Құмкешу ауылының тұрғыны:

- Күбінің ыстауына байланысты, адамның ұстауына байланысты, мысалы, күнде ыстаймыз. Кейбіреулер күнара ыстайды, біз күнде ыстаймыз. Сосын қаймақ жағамыз, ыстап. Сосын жер құнарлы.

Дүйсенбек төрт жыл бұрын күбі пісетін станок сатып алыпты. «70 литрлік қос күбіні қатар пісетін құрылғы қол жұмысын біршама жеңілдетті», - дейді ол. Жалпы Амангелді ауданында қымыз өндірісін табыс көзіне айналдырған кәсіпкерлер аз емес.

Абай Молдаш, Амангелді аудандық Кәсіпкерлік және ауыл шаруашылығы бөлімінің бас маманы:

- Жылда қымыз бойынша Аманкелді ауданын толығымен қамтиды. Одан кейін сыртқа шығады. Мысалы бізде шаруа қожалықтары көп. 600-дей шаруа қожалығы бар. Соның енді тең жартысы қымызбен айналысады деп айта аламын.

Қымкешулік Дүйсенбек Мырзакеев өнімділікті арттыру үшін жылқыны асылдандыру жұмысын қолға алған. Ақтөбе жақтан Мұғалжар тұқымын сатып әкеліп, үйірге қосыпты. «Осыған Үкімет тарапынан субсидия берілсе, жақсы болар еді» деген тілегін білдіріп қалды.

Авторлары: Мағауия Қалиев, Сергей Трахтенберг