Абайдың 180 жылдық мерейтойы Мажарстанда да тойланды. Еліміздің осы мемлекеттегі елшілігі мен «Мажар-қазақ» мәдени ұйымының ұйымдастыруымен көпшілік Будапештегі Абай ескерткішіне гүл шоқтарын қойды. Астана көшесінде орналасқан ескерткішті Мажарстан үкіметі 2014-жылы ашқан. «Әлемдік деңгейдегі кемеңгер-бауырлас халықтардың ынтымағын онан сайын бекемдеді», дейді мажарлар. Қазір Мажарстанда Абайдың тілінде сөйлеп, өлеңдерін жатқа айтуға құштар жандар көп. Ескерткіш жанына жиналғандар ақынның шығармаларын оқып, әндерін шырқады.

Осы шара барысында мажарстандық өнерпаз Тимея Янурикке Президент Қ.Тоқаевтың атынан «Шапағат» медалі табысталды. Тимея Янурик цитера ұлттық аспабымен қазақтың «Ақ баян», «Әлқисса» басқа да әндерін құйқылжыта орындап, талай байқауларда топ жарған. Мәдениеттегі жетістігі мен халықтар достығын нығайтуға қосқан үлесі үшін музыкант «Шапағат» төсбелгісімен марапатталды.

Нұрсұлу Қасым