Қазақстан тағы бір алтын медальмен қуантты, деп хабарлайды Skifnews.kz ақпарат порталы.

Боксшы Бақыт Сейдіш Бангкокта өткен Азия чемпионатында топ жарды.

70 келіге дейінгі салмақ дәрежесіндегі финалда ол өзбекстандық Ойша Тоировамен кездесті. Бірінші раундта төрешілердің шешімімен (3:2) жеңіс қарсыласына берілгенімен, екінші раундта Сейдіш мүлде басқа қарқын көрсетті. Бұл сегментте бес төрешінің бәрі басымдықты қазақ спортшысына беріп, есеп теңесті.

Шешуші раундта екі боксшы да бар күшін салды. Алайда Бақыт Сейдіш соңғы сәттерде дәл әрі мықты соққыларын дарытып, төрешілердің бірауызды шешімімен жеңісті өз қолына алды.