Астана мен Алматы қалаларында жедел жәрдем қызметкерлері бейнежетонмен қамтамасыз етілді.

Бұл олардың және науқастардың құқығын қорғау үшін жасалған. Сонымен қатар елорданың өзінде науқастар үшін жедел жәрдем көлігінің бағыт-бағдарын онлайн бақылау жүйесі іске қосылып жатыр. Әзірге жобалар пилоттық режимде қолға алынды. Егер сәтті жүзеге асырылса, жаңашылдық өзге өңірлерге де енгізіледі.

Медициналық бригада шақыртуға барар кезде бейнежетонды ала шығады. Дәрігер Нұрсұлтан Бейсеновтың осы салада жүргеніне он жылдан асқан. Айтуынша, науқастар тарапынан бірнеше рет жұдырық ала жөнелгендер болыпты. Мұндай жанжалдарды бейнематериалсыз дәлелдеу қиынға соқты, дейді ол.

Нұрсұлтан Бейсенов, жедел жәрдем бригадасының дәрігері:

- Біреулер ішіп, бізді түсінбейді. Көбінше ішкен адамдар бізге нападение жасауы мүмкін да. Науқастардың туыстары, науқастардың өзі шабуыл жасаған. И дене жарақатын да алғанбыз. Бірақ бәрі ортада шешіліп, бәрі дұрыс болды. Ол кезде бейнежетон болмады, басқа да құралдар болмады.

Жобаны Денсаулық сақтау министрлігі мен "Қазақтелеком" компаниясы бірлесе жүзеге асырып отыр. Бейнежетон науқастар үшін де тиімді. Өйткені оларға көрсетілетін алғашқы медициналық көмек түгелдей таспаға түседі. Егер қандай да бір шағымы болса, бейнематериалды дәлел ретінде қолдана алады. Ал таспаны дәрігерлер өшіре алмайды.

Еркебұлан Смадияров, тілші:

- Біз қазір диспетчер орталығындамыз. Мамандар бұл жерде жедел жәрдем көлігінің бағыт-бағдарын көріп отырады. Мінеки қазір медициналық бригада шұғыл шақыртуға кетіп бара жатыр.

Егер медициналық бригада оқыс жағдайға тап болса, SOS батырмасын басып, диспетчер орталығына жедел хабарлайды. Бейнежетонның тағы бір ерекшелігі — іздеуде жүрген адамдарды тани алады.

Нұрсұлтан Бейсенов, жедел жәрдем бригадасының дәрігері:

- 5-6 метр қашықтықта егер іздеуде жүрген адам тіркелсе, ол бірден диспетчерлік бөлімге, ішкі істер бөліміне түседі. Біз әртүрлі адаммен жолыққандықтан кейбір адамдар шынымен іздеуде жүреді.

Денсаулық сақтау министрлігінің мәліметіне сүйенсек, кейінгі 4 жылдың өзінде ел бойынша 150-ден астам жедел жәрдем қызметкеріне науқастар мен олардың туыстары жұдырық ала жөнелген. Жанжалдың себеп-салдарын анықтау және алдын алу үшін бейнежетонның маңызы зор болмақ, дейді мамандар. Сонымен қатар жыл соңына дейін жедел жәрдем көліктері камерамен қамтамасыз етілмек.

Аружан Көпенова, қалалық цифрландыру және мемлекеттік қызмет басқармасының бас маманы:

- 100-ге жуық жедел жәрдем көліктеріне 400-ге жуық камера орнатылады. Ол медициналық қызметкерлерің қауіпсіздігі үшін. Барлық жағдайлар болған кезде фиксация жасау үшін жасалынады.

Бұдан бөлек елордада шұғыл медициналық көмекке жүгінген тарап жедел жәрдем көлігінің бағыт-бағдарын онлайн көре алады. "Яндекс" компаниясымен келісім жасалған. Қоңырау шалған адамға бірден интерактивті картаның сілтемесі бар хабарлама жолданады.

Еркебұлан Смадияров, Асхат Қарағойшиев