Астана қаласының алты стационарында медицина қызметкерлерінің қауіпсіздігін қамтамасыз ету үшін тәулік бойы жұмыс істейтін күзет бекеттері ұйымдастырылды, деп жазады Egemen.kz.

Қала әкімдігінің мәліметінше, мұндай шара пациенттермен бірге келетін адамдардың медициналық персоналға шабуыл жасау жағдайларының жиілеуіне байланысты қабылданған.

Полиция қызметкерлері оқыс оқиғалар жиі болатын қабылдау бөлмелерінде кезекшілік етеді.

Азаматтардың құқыққа қайшы келетін әрекеттері туындаған жағдайда полиция қызметкерлері олардың алдын алу үшін заң аясында әрекет етуге құқылы.

Бүгінде күзет бекеттері ересектерге арналған үш қалалық көпсалалы ауруханада, №2 қалалық балалар ауруханасында және екі республикалық клиникада ұйымдастырылған.

Жақын арада Полиция департаментімен бірлесіп №1 және №3 көпсалалы балалар ауруханаларында, сондай-ақ қалалық перинаталдық орталықта күзет бекеттерін орнату мәселесі қаралып жатыр.

Медицина жұмыскерлері аталған бастаманы қолдап, оның қауіпсіз және тұрақты жұмыс ортасын құруға ықпал ететінін атап өтті.

«Қауіпсіздік бекеттері – біздің іс жүзінде қорғалғанымыздың белгісі. Қабылдау бөлімінде тәулігіне түрлі жарақаттары бар, әртүрлі жағдайды басынан өткерген 400-ге жуық адам жүгінеді. Біз пациенттердің ғана емес, сонымен қатар олардың туыстарының да агрессиясына тап боламыз. Барлығы шұғыл көмекті қажет етеді, ал медициналық көмек Triage сұрыптау жүйесі бойынша жүзеге асырылатыны ескерілмейді. Әр пациенттің өзіндік «басымдық дәрежесі» бар. Бірақ, өкінішке қарай, дәрігерге деген құрмет жоқ», деді №2 көпсалалы қалалық аурухананың Қабылдау бөлімінің меңгерушісі Мәдина Табылдықызы.

Айта кетейік, Президент Қасым-Жомарт Тоқаев физикалық күш қолданғаны және медицина жұмыскерлеріне қатыгездікпен қарағаны үшін жазаны қатаңдатуды тапсырған болатын.