Құрманғазы ауданының тұрғындары жол азабын тартып отыр.

Басталған құрылыстың бітетін түрі жоқ, — деп наразы ауыл жұрты. Шалғайдағы Азғыр, Сүйіндік, Асан ауылдарын айтпағанда, аудан орталығына жақын орналасқан Ғизат Әліпов, Ақкөл ауылдарындағы құрылыс та созбалаңға салынды.

Бұл жол Ақкөл, Ғизат Әліпов, Қиғаш және Дыңғызыл ауылдарын аудан орталығымен байланыстырады. 2020 жылы басталған 43 шақырым жол құрылысы әлі аяқталмай жатыр.

Жауын-шашында аудан орталығына қатынау қиын.Тұрғындар 5 жылдан бері жол құрылысының аяқталуын күтіп жүр. Жобаның мерзімінен кешігу себебі, құрылыс материалдары қымбаттап кетті дейді ,- дейді мердігер мекеме өкіл.

Наурызбек Сабыров, мердігер мекеменің өкілі:

- Бағаның өсуіне байланысты 2021-22 жылы жұмыс тоқтап қалды. Жобаның түзетуіне байланысты. 2024 жылдан бастап осы 40 шақырым жол тегістеліп, негізгі 20 шақырымы төселіп, 17 шақырымға асфальт жабындысы төселді. 2026 жылдың аяғына дейін жол толықтай тапсырылады.

Тұрғындар тағы 1 жыл күтуге мәжбүр. Қазір құрылысқа 40 адам, 25 техника жұмылдырылған. «Атырау-Астрахань» халықаралық автомагистраліне жақын орналасқан ауылдар үшін бұл жолдардың маңызы зор. Жоба толық аяқталса жергілікті тұрғындардың қозғалысын едәуір жеңілдетеді. Өңірде биыл 45 елдімекеннің жолын жақсарту үшін 80-ге тарта жоба қолға алынған. 260 шақырымға жуық жол жөнделедІ.

Алтынбек Бейбітов, облыстық Жолаушылар көлігі және автомобиль жолдары басқармасының бас маманы:

- Барлығы 78 жобаға 59 млрд қаралған. Оның ішінде 7,5 млрд-ы республикалық бюджеттен, 51,5 млрды жергілікті бюджеттен қарастырылған. Жалпы облыстың асфальтпен қамту көрсеткіші 2024 жылы 78 пайызға жеткізілді. Қазір аталған жобаларды іске асыру арқылы 2025 жылы 82 пайызға жеткізу жоспарлануда.

Жалпы өңірдегі автомобиль жолдарының ұзындығы 6500 шақырымға жуықтайды. Биыл облыстық маңызы бар Атырау-Индер жолының 100 шақырымы орташа жөндеуден өтеді. Сондай-ақ шалғай жатқан Асан, Азғыр, Сүйіндік ауылдарына апаратын 140 шақырым жолдың орташа жөндеу жұмыстарына жобалық-сметалық құжаттама жасалып жатыр.

Асланбек Шығыр, Амантай Мәтенов, Жандос Рахметуллин, 24KZ