Ертеңнен бастап тұрғын үй кезегінде тұрғандар тізімі жергілікті атқарушы органдардан «Отбасы банкке» өтеді, деп хабарлайды 24kz.

Сөйтіп, қаржы ұйымы кезекке қою және үйлерді бөлуге міндеттеледі. Ал жергілікті билік азаматтарды баспанамен қамтуға және құрылысқа жауапты. Әділ бөлу үшін кезекке қойылған күн мен мұқтаж жандардың табысы да ескеріледі. Бұл өзгеріс баспана кезегінде бұрыннан бері тұрған азаматарға әсер етпейді. Есепке жаңадан тұрғандар тізімнің басына шықпайды, тек әрі қарай реттілікті жалғастырады. Бұл туралы Өнеркәсіп және құрылыс министрлігі комитеті төрағасының орынбасары мәлімдеді. Барлық ақпаратты ашық платформадан алуға болады. Ал баспанаға кезекке тұру үшін orken.otbasybank.kz сайтына жеке бас ақпаратын көрсетіп, өтінім жолдау қажет.

Қанат Мыңбаев, ҚР ӨҚМ Құрылыс және тұрғын үй-коммуналдық шаруашылық істері комитеті төрағасының орынбасары:

- Бұл жерде барлығы ашық. Жалпы электронды түрде ешқандай мәселе жоқ. Кейбір азаматтар: «Кезектен «алып тастады, кезегім келіп болмай жатыр», — деп ай туы мүмкін. Оның барлығы негізінде елдегі салынып жатқан құрылыстың қарқыны. Кезекте тұрған азаматтардың кезектілігі жылдам жүреді. Біз неғұрлым тұрғын үй көлемін ұлғайтатын болсақ, соғұрлым кезек жылдам келеді.

Жалпы елде кезекте тұрған азаматтарды қолдауға бағытталған бірқатар мемлекеттік бағдарлама бар. Соның бірі – жалға берілетін тұрғын үймен қамту. Былтыр 13 мың адам осындай мүмкіндікке ие болды. Өнеркәсіп және құрылыс министрлігінің Құрылыс және тұрғын үй-коммуналдық шаруашылық істері комитетінің мәліметінше, елде 654 мыңнан астам адам баспана кезегінде тұр.