Обыр дерті дендеп тұр. Былтыр 41 мыңнан астам адамнан аты жаман ауру анықталды. Бұл 10 жылдағы орташа көрсеткіштен 3,2% көп. Онкология әсіресе әйелдер арасында белең алып тұр.

Мамандардың мәліметінше, сүт безіндегі қатерлі ісік, тоқ және тік ішек, өкпе обыры көбейген. Өлім-жітім 33% азайған. Бұл жайлы Қазақ онкология институтының баспасөз қызметі хабарлады. Ең сорақысы, сырқат жыл санап жасарып келеді.

Бейбіт Мұсабеков, Астана қалалық көпсалалы медицина орталығының бөлім меңгерушісі:

- Жасына қарай сол 45-50 жастағылар көп болатын. Қазір осы сүт безі обыры кеңінен тарап жатыр. Қазіргі таңда күнде емханада қабылдау жүргіземіз. 25-30 жастағы науқастар өте көп келіп жатыр. Ерте анықтау үшін бізде сүт безінің обыры, қуықасты безі обыры, өкпе обырына байланысты скрининг бар. Сол скринингтің пайда болуына байланысты адамдар ерте стадиямен келіп жатыр.

Сырқаттану санының көбеюіне тұрғындардың скринингтен тұрақты өтуі де себеп көрінеді. Былтыр 2,8 млн жан медициналық тексерістен өткен. Қазір елде аты жаман ауруға қарсы ем-дом жүргізетін 2 ұлттық және 20 өңірлік онкологиялық орталық жұмыс істейді.