Алматы тұрғындарының жылу энергиясы үшін берешегі 2 миллиард теңгеге жуықтады, деп хабарлайды 24kz.

Бұл бес жыл бойы жиналып қалған қарыз. Соның бір жарым миллиард теңгеге жуығы биылғы жылу маусымына тиесілі. Енді коммуналдық мекеме қарызды тұтынушылардан сот арқылы өндіріп алмақ. Мамыр айынан 600-ден астам көпқабатты үй мен ондаған мекеме ыстық судан ажыратылды. 800-ден аса адамның есепшоты бұғатталған. Осыған байланысты жүздеген тұрғын шетелге шыға алмай отыр. «Алматы жылу жүйесі» серіктестігінің өкілдері бұлай жалғаса беретін болса, салада едәуір қиындықтар туындайды деп отыр.

Бағдаш Нұрсейітов, «Алматы жылу жүйесі» ЖШС коммерциялық директоры:

- Бұл берешегі бар тұтынушыларға қарыздарды қайтару жұмысы күнделікті жүргізіледі. Бірақ көп тұтынушылар қазандық ошақ жылу маусымы аяқталғаннан кейін жылу және ыстық су үшін төлемдерді күзге дейін қалдырып отырады. Өйткені жылу бітуіне байланысты енді жылуға ақша төлеу қажеті жоқ деп барлық төлемдерді күзге дейін қалдырып отырады. Сондықтан осындай қарыздар жазғы маусымда, жаз айларында өте көп жиналады.