Атырау облысы Қызылқоға ауданында шегіртке қаптап кетті, деп хабарлайды 24KZ. Зиянкестер көптігінен «Қарабау – Миялы» күрежолы бойындағы көлік қозғалысы қиындады. Әзірге ауылдық округтер мен оған қарасты бау-бақша аман. Қазір зиянкестер зақымдаған аумақтың көлемі анықталып жатыр.

Ерте көктемде облыс бойынша 128 мың гектардан астам алқапта шегірткеге қарсы химиялық өңдеу жүргізілген болатын. Бірақ шілде айы басталысымен зиянкестер қайта бас көтерді. Қалыптасқан жағдайға байланысты облыстық ауыл шаруашылығы басқармасы аталған ауданда шегірткемен күресті қайта қолға алды.

Азат Қапанов, облыстық АШБ бөлім басшысы:

- Қызылқоға ауданы бойынша саяқ шегірткеге қарсы 2510 гектарды өңдеу жоспарланған. Зерттеу актісінің нәтижесінде қосымша 15 мың гектарға жергілікті бюджет есебінен 68 млн теңге қаражат бөлінді.