Енді қазақстандықтар кез келген уақытта онлайн тегін заңдық, құқықтық кеңес алады. Мұндай сервисті Бөкетов атындағы Қарағанды университеті ғалымдары мен IT мамандары бірлесіп дайындады. Бүгінде онлайн-сервис пилоттық жоба ретінде іске асып, мыңдаған адамдарға заңды кеңес берген.

LegalExpert.kz атты еліміздегі алғашқы тегін заңгерлік онлайн-сервис 1 шілдеден бастап Қарағанды облысы аумағында жұмыс істеп тұр. Жасанды интеллект базасындағы жүйе құқықтық мәселелерді нақты шешуге көмектеседі: жұмыс берушімен болған қарапайым проблемалардан бастап, азаматтық, әкімшілік немесе қылмыстық құқық саласындағы неғұрлым күрделі жағдайларға дейін оңтайлы кеңес бере алады.

Нұрлан Дулатбеков, Е.Бөкетов атындағы Қарағанды зерттеу университетінің ректоры, жоба мүшесі:

Заңгер ғалымдардың осы бір жобасы қазіргі күннің талаптарымен жасалған. Қарапайым халыққа тиімді жолдарды іздеп жатырмыз. Ақша үнемдеу, уақыт үндемдеу ең алдыменен барлығының теңдігін қамтамасыз етуге үлкен жұмыс. Бұл бірінші қадамдар.

Онлайн платформаға 100 мыңға жуық сот ісі бойынша ақпарат енгізілген. 10 күннің ішінде 1000 аса өңір тұрғындары кеңес алып үлгерген. Солардың бірі Азамат Жашкеев. Дәрігер қарапайым болса да ұзақ уақыт шешімін таппай жүрген мәселесін LegalExpert.kz арқылы бір жақты етіпті.

Азамат Жашкеев, дәрігер:

Жер үйде тұрамыз. Аулаға көп машина қойып мен шыға алмай жатамын. LegalExpert.kz сайтына жазып, қарадым. Заң бойынша шешуге кеңес алып, бәрі реттелді. Ешқандай қиындығы жоқ. Телефонмен қарауға болады. Мәселе ақшада емес, уақыт сақтауға болады.

Онлайн сервис қарапайым түрде жұмыс істейді. Жасанды интелект арқылы диалог құрып, мәселені жан жақты түсіндіруге де болады. Тіпті кейбір сот ісі бойынша жақсы қорғаушылар рейтингін құрып, ұсынады.

Лариса Құсайынова, жоба жетекшісі:

Біз бұл платформа арқылы заңгерлерді толықтай алмастыра алмаймыз. Дегенмен соттың барынша әділ, әрі ашық өтуін қамтамасыз етуге ат салысамыз. Қарапайым халыққа, барлығын қарапайым түрде түсіндіріп, кеңес бергіміз келеді. Бұл басты мақсат.

Санаулы минуттарда сан сауалға жауап беретін жоба бірнеше шет елдің назарын аударған. Сервис қазақ және орыс тілдерінде жұмыс істейді. Қазір Қарағанды облысында пилоттық режимде іске қосылғанымен, Қазақстанның барлық тұрғындары үшін ашық.

Жандос Бақытұлы