Кәсіпкер Қайрат Боранбаевтан тәркіленген фитнес орталық халық игілігіне берілді.

Бұрын ақылы болған кешенге кіру бұдан былай әлеуметтік осал топтағы жандарға тегін. Бұл жеңілдік кәсіби спортқа ден қойған балалар мен жасөспірімдерге, мүмкіндігі шектеулі жандарға арналған.

Әмір Алпамысқа тумасынан аутизм диагнозы қойылған. Бала кезінен шомылуды жаны сүйеді. Өзін суда балықтай сезінеді. Фитнес орталыққа күнде келеді. Алдағы уақытта Әмір паралимпиадаға және Азия құрлығының арнайы жарыстарына қатысуға ниетті. Асқақ арманына жету жолында фитнес орталықтың тигізіп жатқан пайдасы мол, дейді.

Әмір Алпамыс, фитнес орталыққа келуші:

- Менің арманым — өрт сөндіруші болу еді. Бірақ қазір жүзу спортымен айналысамын. Болашақта паралимпиада чемпионы атанғым келеді.

Әлия Әбдібайытова, Әмірдің анасы:

- Біз үшін бұл процедура өте маңызды. Өйткені Әмір суда өзін өте жайлы сезінеді. Көңіл-күйі болмаса немесе қатты қобалжыған сәтте бірден суға түсетін әдеті бар. Осыған дейін бұл бассеин ақылы болатын. Айына 60 мың тг төлеп келдік. Қазір мұнда тегін келіп жүрміз. Бұл бізге жасалған үлкен қолдау деп білемін.

Жаттықтырушылардың айтуынша, фитнес орталық әлеуметтік санаттағы нысанға айналғалы бері келушілердің саны 2-3 есе өсті.

Дмитрий Деревянко, жаттықтырушы:

- Дамуында ерекшелігі бар балалардың денсаулығы үшін бұл орталықтың шарапаты мол. Арбаға таңылғандар мен паралимпиадашылар мұнда жиі келеді. Өзара бас қосып, бірге шынығады. Бұл жер олардың екінші үйіне айналды десем артық айтқаным емес.

Осы күнге дейін Астана қаласының қылмыстық істер жөніндегі сот шешімі негізінде жалпы аумағы 40 га тең 81 жер учаскесі тәркіленді.

Жанжігіт Сембеков, Астана қаласының сәулет, қала құрылысы және жер қатынастары басқармасы бөлімінің бас маманы:

- Оның ішінде 56 жер учаскесі 17 га көлемінде мемлекеттік қорға қайтарылды. Аталған жер учаскелері Астана қаласынан 2035 жылға дейін бекітілген бас жоспар үшін пайдаланылатын болады. Оның ішінде әлеуметтік құрылыс обьектілері де болады.

Еске сала кеткен жөн, Қаржылық мониторинг агенттігінің кәсіпкер Қайрат Боранбаевқа қатысты тергеу жұмыстары нәтижесінде бюджеттен 1 миллиардтан астам теңге жымқырылғаны анықталған болатын. Сот шешімі бойынша құны 5 млрд теңгеге тең жылжымайтын мүліктері тәркіленді. Қазір пробация бақылауында жүрген Боранбаевтың мемлекетке қайтарған нысандарының ішінде сауда ойын-сауық кешендері де бар.

Мирлан Алтынбек, Жанаман Ерғалиев