Ауғанстан мен Өзбекстан шекарасында орналасқан «Термез» сауда орталығына жас әйелдердің кіруіне шектеу қойылды. «Талибан» билігі 40 жасқа дейінгі қыз-келіншектерге бұл кешенге баруға тыйым салған , деп хабарлайды Skifnews.kz ақпарат порталы.

Бұған дейін ауған азаматтарына орталық аумағында визасыз 15 күнге дейін жүруге рұқсат берілген. Сауда кешенінде төрт мыңға жуық дүкен, мейрамхана, медициналық қызмет көрсету пункттері мен өндірістік аймақтар орналасқан. Шекаралас аудандардан бұл жерге отбасылар жиі келетін. Алайда жаңа талаптан кейін келушілер күрт азайған.

Кәсіпкерлер табыс көзінен айырылып, шекара маңындағы сауда тұралап қалды. Өйткені орталықтың негізгі клиенттері — жас әйелдер болатын.

Бұл шешім Ауғанстандағы әйелдердің қоғамдық өмірге араласуын шектеуге бағытталған жалпы саясаттың жалғасы. 2021 жылы билікке келгеннен бері тәліптер қыз балалардың мектепке баруын, университетте оқуын, үкіметтік емес ұйымдарда жұмыс істеуін, спортпен айналысуын және тіпті ән айтуын да заңсыз деп таныды. Әйелдер істері жөніндегі министрлік таратылды.