«Орталық Азия-Қытай» саммиті – ортақ мүдделер мен тың бастамалар тоғысқан алаң.

Аймақтың жан-жақты дамуы осы жиында талқыланбақ.

Саммитке орай жүздеген мәртебелі мейман Астанаға арнайы келді.

Қазақстан мен Қытай экономиканың барлық саласында әріптестікті дамытуы қажет. Әсіресе жасанды интеллект, медицина мен энергетика саласындағы іскерлік байланысты нығайтуға мүмкіндік мол. “Орталық Азия – Қытай” саммитіне орай елге келген шетелдік меймандардың пікірі осы.

Ван Синг Тин, медицина ғылымдарының докторы /Қытай/:

- Қазақстан кейінгі жылдары халықаралық жобаларды белсенді жүзеге асырып жатыр. Яғни жергілікті кәсіпкерлер кез келген бастаманы талқылап, қолға алудан қорықпайды. Мен осы жолы мықты іскер азаматтармен таныстым. Мұнай-химия, медицина саласында бірлескен жобаларды қарастырамыз.

Фрэнсис Чанг, “Tus City Group” компаниясының вице-президенті /Қытай/:

- Мұндай кездесулер екі жаққа да тиімді. Себебі осы алаңның арқасында қазақ-қытай кәсіпкерлері тығыз байланыс орнатады. Бізде жасанды интеллекті саласы өркендеп келеді. Қазақстан да бұл саланы жеделдетіп дамытуға кіріскенін көріп отырмыз. Келешекте осы салады тығыз жұмыс істесек, жақсы нәтижегеге қол жеткізуге болады.

Иә, бұл басқосу тың бастамалар мен бірегей жобалар алаңына айналмақ. Келелі тақырыптар талқыланып, маңызды мәселелер қаузалады. Сондықтан мұндай кездесулерді жиі өткізу қажет деп санайды қатысушылар.

Жасур Парпиев, “Jasmir Brand” тігін фабрикасының бас директоры /Қырғызстан/:

- Қырғызстанда мындай іс-шараларды өткерсек деген. Қырғызстанда да осындай іс-шаралар жиі өткізілсе, кәсіпкерлерге жақсы болар еді. Бұл баршамызға үлкен тәжірибе. Қазір көріп отырмыз, осындай кездесулердің арқасында қазақ-қытай арасындағы байланыс нығайып отыр.

Шетелдіктер қазақтың қонақжайлығын жоғары бағалайды. Тіпті Сарыарқаның самалы да сарайыңды ашады дейді олар.

Фрэнсис Чанг, “Tus City Group” компаниясының вице-президенті /Қытай/:

- Қазақстанға бұған дейін 5-6 рет келдім. Маған қазақ асханасы керемет ұнайды. Әсіресе бесбармақтың дәмі тіл үйіреді. Келген сайын міндетті түрде ұлттық тағамнан дәм татамын.

Ван Синг Тин, медицина ғылымдарының докторы /Қытай/:

- Қазақ жерінің табиғаты, ауа райы тамаша. Мысалы, Қытайда көбіне ыстық, қапырық болып тұрады. Ал сіздердің күн жанға жайлы, қоңыр салқын. Адамның тынысы кеңиді.

“Орталық Азия-Қытай” саммиті аясында жоғары деңгейдегі екіжақты кездесулер өтеді. Елдер арасындағы стратегиялық серіктестікті нығайту мәселелері талқыланбақ.

Нұрқанат Қанапия, Альмира Оразбай, Абдулхамит Бөлекбаев