Жамбыл облысының прокурорлары ата-ана қамқорлығынсыз қалған 20 баланың құқығын қорғады, деп хабарлайды 24KZ. Қордай мен Шу аудандарында және Таразда үй кезегінде тұрғандарға пәтер беру кезінде заң бұзылған. Прокурорлар тексеру жүргізіп, біраз былықты ашты.
Жергілікті билік пәтер кезегін сақтамай, әлеуметтік осал топтағыларды баспанасыз қалдырған. Тұрғын үй-коммуналдық шаруашылық бөлімінің мамандары: «Ұмытып кетіппіз», – деп ақталған. Заң бойынша мемлекеттік тұрғын үй қорының 20%-і жетім балаларға тиесілі. Құзырлы орган араласқаннан кейін пәтерлер кілті заңды иелеріне табысталды.
Жүсіп Берлібай, облыс прокурорының аға көмекшісі:
- Қордай және Шу аудандарында лауазымды қызметкерлер сөгіс түрінде тәртіптік жауаптылыққа тартылды. Ал одан бөлек, 93 бала тұрғын үй кезегіне уақытылы қойылмау фактісі анықталды. Ол бойынша да қадағалау актісі енгізіліп, қазіргі таңда олар тұрғын үй кезегіне қойылды.
