15 маусым – Әкелер күні. Әлемде бұл мереке маусымның үшінші жексебісінде аталып өтіледі. Бізде де биыл үшінші жыл қатарынан тойланып отыр. Мерейлі мезет ерлер қауымының қадір-қасиетін арттырып, қоғамдағы әкелер институтының дамуына үлес қосуға бағытталған.
Әкенің қас-қабағы баланың бас сабағы болуы тиіс. Дегенмен бүгінгінің бұзығын тәрбиелеп, ақылды тентегін тезге салу қиын. Себебі заман басқа, заң басқа. Сонда қазіргі әке қандай болу керек? Осыны ойланған қоғам белсенділері әкелер декларациясын қабылдады. Мұнда бүгінгі әкенің рөлі, отбасындағы отағасының образы анық жазылған. Ол «ХХІ ғасыр әкесі: әрекетке шақыру» деп аталады.
Бекдайыр Күзембай, «Әкелер одағы» республикалық қоғамдық бірлестігі төрағасының орынбасары:
- Заманауи әке өзінің, баланың ішкі дүниесіне үңіліп, баланың тұлға болып қалыптасуына өзінің көшбасшылығын көрсетуі керек. Қазіргі осы қиын жаһандану, жасанды интеллект заманында бала неше түрлі депрессияға ұрынбау үшін әкемен сырласып отырып, осы қиындықтарды өту үшін, әке жауапты, саналы әке болу үшін не істеу керегін осы декларацияда атап өтеміз.
Жаңа құжат мереке қарсаңында өткен республикалық әкелер форумында қабылданды. Айтайық, кеңес биыл оныншы мәрте ұйымдастырылып отыр. Оған өңірлерден 200-ге жуық жан қатысты. Жиын алаңында тұрмыстық тіршіліктегі түрлі түйткілдерді тарқатудың тетіктері талқыланды. Жиынға әкелермен қатар аналар да атсалысты.
Баян Ахатай, ҚХА республикалық Аналар кеңесі төрағасының орынбасары:
- Тек қана отбасы емес, Отан да осы әкеге қарап тұр. Себебі әке темірқазық, әке үлгі. «Әкеге қарап оқ жонар» деген сөз бар. Әкенің жасағанын бала жасайды. Мына қазақта тәрбиенің мәнін екі-ақ деңгейлі қылып айтады. Көргенді немесе көргенсіз деп. Сондықтан әкеден көргенді ұл міндетті түрде жасайды. Біз аналар қауымы осы әкелерге қолдау болуға дайынбыз. Әкелердің саясында болып, бесік тербей беруге дайынбыз деп айтқым келеді.
Әкелер күнін атап өту үшін елде арнайы апталық жарияланды. Бір жұманың бедерінде түрлі шаралар ұйымдастырылды. Жалпы бас-аяғы бізде әкелер институтын қолдау мақсатында жыл сайын 7 мыңнан астам іс-шара өткізіледі.
Авторы: Шернияз Жалғасбекұлы
