Медицина қызметкерлерінің кәсіби мерекесіне орай жүзге жуық денсаулық сақтау саласының ардагері мен үздік дәрігерлерге және кіші буын мейірбикелерге құрмет көрсетілді.
Сондай-ақ «Үздік медицина қызметкері» байқауының жеңімпаздары да лайықты марапатталды.
Салтанатты жиында облыс әкімінің орынбасары медицина қызметкерлерін кәсіби мерекесімен құттықтап, денсаулық сақтау саласын дамытуға үлес қосқан үлесі үшін ерекше алғыс білдірді. Мерейлі мамандық иелеріне «Еңбек ардагері», «Денсаулық сақтау ісінің үздігі», «Денсаулық сақтау ісіне қосқан үлесі үшін» төсбелгілерін табыс етті.
Гүлнар Аманбекова, Бәйдібек аудандық орталық ауруханасының акушер-гинекологы:
- Өзім Бәйдібек ауданының орталық ауруханасының гинекология бөлімінде акушер-гинеколог болып жұмыс істеймін. Өте қуаныштымын. Бүгін облыс әкімінің алғыс хатымен марапатталып жатырмын. Бүгінгі мереке барлықтарыңызға құтты болсын. Барлық отбасыға амандық, жақсылық тілеймін.
Кәрібай Досанбаев, денсаулық сақтау саласының ардагері:
- Мен бұл медицина саласында Қазығұрт ауданында 50 жыл жұмыс істеп, әлі де тыным таппай, сол жерде ардагерлер кеңесінің төрағасы болып жұмыс істеп келемін. Бүгін еңбектерімізді елеп, "Еңбек ардагері" деген марапатты ұсынып отыр. Алып отырмыз, рақмет!
Түркістан облысында 24 мыңнан астам медицина қызметкері халықтың денсаулығын жақсартуға үлес қосып келеді. Биыл 20 дәрігер көрші Ресей елінде, 200 астам дәрігер мен 300-дей мейірбике еліміздегі жоғарғы медициналық орталықтарда біліктілігін арттырады.
Бейсенбай Тәжібаев, облыс әкімінің орынбасары:
- Мемлекет басшысының тапсырмасымен былтыр "Ауылдағы денсаулық сақтауды жаңғырту" жобасымен 49 нысанды біз арнайы пайдалануға бердік. Біз жылдың соңына дейін тағы да 32 нысанды соғып, халық игілігіне ұсынамыз. Қалған 40 нысанды 2026 жылы шешуді жоспарлап отырмыз. 2027 жылы өңірдегі медицциналық нысандардың қажеттілігін жүз пайыз шешеміз деген жоспармыз бар.
Өткен жылы өңірдегі медициналық ұйымдардың қызмет көрсету сапасын жақсарту үшін 8,8 млрд теңгеге 500-ден астам заманауи құрал-жабдықтар сатып алынды. Одан бөлек 3 ауданаралық аурухана күрделі жөндеуден өтіп, қажетті медициналық жабдықтармен қамтылды. Биыл 1 аудандық аурухана толық жөндеуден өтеді. Бұл өңірдегі медициналық нысандардың заман талабына сай жұмыс істеуіне мүмкіндік бермек.
Жандос Жұмабек, Ерболат Әбіш
