«Таза Қазақстан» жалпыұлттық экологиялық акциясы аясында батысқазақстандық белсенді жастар бүгін базарларды аралап, кәсіпкерлер үшін түсіндіру жұмыстарын өткізді, деп хабарлайды 24kz.

Оралдың орталық базары адам аяғы үзілмейтін, халық көп жиналатын орын. Әдетте осы нысан төңірегіндегі түрлі дүңгіршек иелері мен көшеде сауда жасайтындар тазалық талаптарына немқұрайлы қарайтыны рас. Еріктілер сонымен қатар тұрғындарға туған өлкеміздің табиғатын аялауға шақырған түрлі жадынамалар таратты. Жыл басынан бері «Таза Қазақстан» акциясы аясында өңірде 10 мың текше метрдей көң-қоқыс жиналып, 19 мың тал-терек егілген. Қоршаған ортаны қорғау шараларына 5 мыңдай азамат қатысқан.

Нұрсұлтан Сәрсенбаев, БҚО Жастармен жұмыс жөніндегі ресурстық орталық басшысының орынбасары:

- Осындай іс-шаралар арқылы біздер тек көшені тазалап қоймай, халықтың санасында осы «Таза Қазақстан» экологиялық акциясын, тазалық идеологиясын насихаттауды жүзеге асырып жатырмыз. Осыған дейін тек тазалау жұмыстары жүріп келген болатын. Енді әлеуметтік сауалнама қоямыз. Ол жерде сұрақтарымыз: «Орал қаласының тазалығын 1-ден 10-ға дейін бағалаңыз» — деген секілді. Сөйтіп, халықтың экологиялық акциясы жөнінде ойын білетін боламыз.