Валерий Рахымжан әлем кубогінде жүлдеге ілікті.

Дәл қазір Германияның Мюнхен қаласында дүниежүзілік дода өтіп жатыр. Оған 78 елден 700-ге жуық спортшы жиналды. Араларында ұлттық құрама өкілдері де бар. Жарыстың алғашқы күні 10 метрдегі нысананы пневматикалық тапаншамен ату бәсекесі болып, ерлер арасында қазақстандық Валерий Рахымжан үздік үштікке кірді. Нақтырақ айтқанда, ол финалда 241.9 ұпай жинап, екінші орынға тұрақтады. Яғни, қоржынымызға күміс түсті. Алтын жүлде қытайлық, қола жүлде германиялық спортшыларға бұйырды. Алда әлі 3 жарыс күні бар. Яғни байрақты бәсеке 15-маусымға дейін жалғасады. Осы аралықта спортшыларымыз жеңіс жолын жалғап, әлемдік рейтингтегі жағдайын одан сайын жақсартуы қажет. Тағы бір айта кетерлігі Мюнхендегі Әлем Кубогы биыл Мысырда өтетін Әлем чемпионаты мен Қазақстанда өтетін Азия чемпионаты алындағы негізгі дайындық саналады.

Жәмила әлемдік рейтингте топ бастады

Жәмила әлемдік рейтингте топ бастады. Біріккен күрес әлемі ұйымы соңғы жарыстардағы көрсеткіштерді саралап, үздік спортшылардың тізімін жаңартты. Оған сәйкес қазақстандық Жәмила Бақбергенова өз орнын сақтап қалды. Еске сала кетейік, сәуір айындағы рейтингте 72 келіде өнер көрсететін қазақ қызы бірінші орыннан жапониялық Эми Ишиды ығыстырған еді. Бұған Жәмиланың Азия чемпионатында жеңімпаз атануы себеп болды. Бұл жолы да Эми Иши екінші орында тұр. Үшінші орынға моңғолиялық Болортунгалаг Зоригт жайғасты. Біреу білсе, біреу білмес, Жәмила Бақбергенова әлем чемпионатында 4 мәрте жүлдеге іліккен тұңғыш қазақ қызы. Сонымен қатар ол Азия чемпионатында 4 дүркін чемпион атанды.

Жазғы универсиада жеңімпаздары анықталды

Түркістанда студенттердің жазғы универсиадасы жалғасып жатыр. Осымен 13-рет ұйымдастырылып отырған шараға еліміздегі 76 жоғарғы оқу орнынан 4 мыңнан аса білім алушы қатысуда. Олар спорттың 17 түрінен сынға түседі. Универсида барысында 800-ден астам медаль мен 100-ден аса кубок сарапқа салынады. Кейбір спорт түрлері бойынша жеңімпаздар белгілі. Атап айтсақ волейболшы қыздар сайысында Жетісу мемлекеттік университепті топ жарды. Олар финалда Қазақ спорт және туризм академиясынан басым түсті.

Мұхтар Есқалиев, ҚР Ұлттық студенттер спорт одағының вице-президенті:

- Айта кетейік, Жазғы Универсиаданың ресми жабылу салтанаты 13-маусымда «Olympic Center» спорт кешенінде өтеді деп жоспарланып отыр.