Инвестиция тарту – экономиканы дамытудың негізгі факторы. IV Ташкент халықаралық инвестициялық форумында сөз сөйлеген Премьер-министр Олжас Бектенов осылай деп, сауда-инвестициялық ынтымақтастықты кеңейту жұмыстарының өзектілігіне тоқталды.

Сондай-ақ энергетика мен логистикадағы өңірлік әріптестікті тереңдету, пайдалы қазбалар саласын дамыту, цифрландыру мәселелеріне назар аударды. Инвестициялық форумның пленарлық отырысы барысында Үкімет басшысы трансшекаралық жобаларды бірлесіп іске асыру, өңір елдері арасындағы ынтымақтастықтың басым бағыттарын да атап өтті. Форумға қатысушылар бүкіл өңірдің инвестициялық тартымдылығын арттыру үшін Орталық Азия елдерінің күш-жігерін үйлестірудің маңыздылығын айтты.

Олжас Бектенов, ҚР Премьер-министрі:

- Жақында өткен Астана экономикалық форумында Қазақстан Президенті Қасым-Жомарт Тоқаев еліміздің Орталық Азияның тұрақтылығы берік, ынтымағы бекем, болашағы айқын болғанын қалайтынын ерекше атап өтті. Қазақстан Үкіметі өзара сенім мен орнықты даму рухында табысты және ұзақмерзімді жобалар құруға дайын. Инвестиция тарту – өңірдің экономикалық парадигмасының негізгі факторы. Қазақстан 2029 жылға қарай экономикаға кемінде $150 млрд көлемінде шетелдік капитал ағынын қамтамасыз етуді мақсат етіп отыр. Бұл ауқымды әрі барынша биік мақсаттар, оған қол жеткізуге әбден болады. Ол үшін ұлттық экономиканы құрылымдық қайта құруға бағытталған ауқымды реформалар табанды түрде жүргізіліп жатыр.

Өзбекстанмен тауар айналымы 4 айда 9,5% артты

Форум аясында Өзбекстан президенті Шавкат Мирзиёев Олжас Бектеновті қабылдады. Кездесу барысында сауда-экономикалық, көлік-логистикалық, өнеркәсіптік, су-энергетикалық, мәдени-гуманитарлық ынтымақтастық мәселелері қаралды. Айта кетейік, биылғы төрт айда екіжақты тауар айналымы 9,5% артып, 1,3 млрд долларды құрады. Ал экспорт көлемі 15,9% өсіп, 1 млрд долларға жетті.