Шығыс Қазақстан облысында 40 жыл бойы бітеліп жатқан каналдар механикалық жолмен тазартыла бастады.
Ауылшаруашылық арықтарын арамшөп басып, су өтпейтін күйге түскен. Бұл әсіресе шаруаларды алаңдатып отыр. Мысалы, жаңбыр аз жауатын Күршім ауданындағы фермерлер жаз бойы егістігіне бір тамшы су жеткізе алмай әуре-сарсаңға түседі. Енді арна толық аршылса, өнім молайып шөп шүйгін болар деген үмітте.
Күршім күн райы күрт құбылатын, жаңбыр аз жауатын өңірдің бірі. Жергілікті жұрттың айтуынша, үйіріліп келген бұлт Бұқтырманың үстіне жеткенде басқа жаққа ауып кетеді. Тіпті көпжылдық өсімдік егудің өзі оңай емес. Өзеннен келген су бітелген арнаның бетімен жайылып, діттеген жерге әрең жетеді.
Мұхамет-Дәуіт Сұраужанов мал азығын егумен айналысатын тәжірибелі шаруа. Бірақ уақыт өткен сайын алқапты суару қиындап барады. Арамшөп пен құм басып қалған каналдан келген су шөптің тамырына жетіп жарытпайды. Биыл каналдың тазаланып жатқанын көріп, кеш болса да мол өнім алам ба деген ойда.
Мұхамет-Дәуіт Сұраужанов, шаруа қожалығының басшысы:
- Су береді, су жете алмайды өйткені канал бәрі бітелген қамыс өскен шөп өскен, сондықтан өте қиын болды. Үш-төрт күн ішінде канал тазаланып біткен соң бізге су береді енді.
Күршім мен көршілес Марқакөл арқылы 26 канал өтеді. Оның бәрін қолмен тазалау тіпті мүмкін емес. Сондықтан биыл «Қазсушар» кәсіпорны көп жылғы мәселенің шешілуіне түрткі болды. Қараусыз жатқан каналға экскаватор кіріді.
Уәлибек Рысбек, экскаватор жүргізушісі:
- Жүз метр енді таңертеңнен бері келе жатырмын міне трактордың өзі түсіп шығуы қиын ішіне бітеліп қалған нәрсе ғой қай заманғы. Құмағаш қамыс басып кеткен бәрін сол ақырындып алып жатырмыз енді.
Әзірге 40 шақырым арық тазаланды. Жұмыстың кейбір бөлігі күзге жоспарланып отыр.
Ерғали Мәдинов, "Қазсушар" кәсіпорыны ШҚО филиалының өндірістік учаске бастығы:
- Бұрын бәрі істеліп тұрған ғой, совхоздар арнайы канла тазалаумен айналысатын болған, оның бәрі жоғалды міне еендің Қазсушар қайта күшіне еніп, жатыр. Техника бәрі кеп жатыр, техника берген соң бәрі орнынан келе ме деп ойлап отырмын енді.
Биыл өңірге 16 техника беріледі. Ал келер жылдан бастап Жауғашты, Победа, Қарақия сынды басты каналдар толық жаңартылады.
Эльмира Ахметова, Жігер Бабаханов
