Роботтар да мектепте оқиды . Тәжірибесін шыңдап, нарыққа бейімделеді. Спортта да өздерін сынап жүр. Мәселен, Швейцарияда құралған робот бадминтон ойнауды үйреніп, адамдармен жарысады. Әлемдегі техно-жаңалықтар туралы толығырақ әріптесім Темірлан Нұржанұлының бейнематериалында.

Мектепке адамдар ғана емес, роботтар да баратын болған. Біреуі тіпті оқуын сәтті аяқтап шықты. «Сяотао» атты роботты құраған мамандар жүйе жұмысын жетілдіру үшін Manycore Tech компаниясының арнайы оқуына жіберген. Яғни, ол жерде кеңістікті тану және өзара әрекеттесуді меңгереді. Оқу-жаттығулардан кейін «Сяотаоның» қозғалыс дәлдігі 90 пайыздан асқан. Енді ол әуежайлар мен дәріханалар сынды түрлі мекемелерде тапсырмаларды орындауға қауқарлы.

Бадминтон ойнайтын робот

Ал бұл робот бадминтон спортын шебер меңгерген. Волан бағытын дәл анықтап, ойын алаңында емін-еркін қозғалады. Төрт аяқты техника жасанды интеллект негізінде жұмыс істейді. Оны Цюрих жоғары техникалық университетінің зерттеушілері жобалаған. Робот әртүрлі әрекеттерді қайталап көріп, ең тиімді шешімді қалай қабылдау керегін үйренеді.

Юнтао Ма, ETH Zurich Robotics Systems зертханасының түлегі:

Бұл жобада біз роботтардың қозғалысын, көру қабілеті мен басқару жүйесін біріктіріп, осындай қарқында спортта қалай қолдануға болатынын көрсеттік.

Табиғатты суреттеген жасанды зейін

Лондонда жасанды зейін көмегімен табиғат туындыларын бейнелейтін инсталляция орнатылды. Көрмеге қойылған техника түрлі фотодеректерді пайдаланып, арнайы алгоритмдер негізінде ауа-райының құбылысы мен табиғат көрінісін суреттей алады. Жоба авторы Дэмиен Роучтің мақсаты- адамдардың қоршаған ортаға деген қызығушылығын жаңа технологиялардың көмегімен арттыру.

Темірлан Нұржанұлы