Цифрлық даму, инновациялар және аэроғарыш өнеркәсібі министрлігі 5-нен 6 маусымға қараған түні Қазақстанның бірқатар қаласының аспанында байқалған ерекше құбылысқа қатысты мәлімдеме жасады. Министрлік өкілдері бұл құбылысты тудыруы мүмкін үш ықтимал нұсқаны атады, деп хабарлайды KAZ.NUR.KZ.

Министрліктің мәліметінше, 5-нен 6 маусымға қараған түні аспандағы ерекше құбылысты Астана, Қарағанды, Павлодар және Қостанай қалаларының тұрғындары байқаған.

"Алдын ала мәліметтер бойынша, бұл орбитада бұрын болған ғарыш нысандарының бірінің атмосфераға енуімен байланысты.

Ғарыштық қалдықтардың қозғалысын бақылайтын халықаралық ұйымдардың деректеріне сәйкес, дәл осы уақыт аралығында үш оқиға тіркелген, олардың әрқайсысы байқалған құбылысты тудыруы мүмкін:

1. Қытайдың ZQ-2E зымыранының үдеткіш блогы

• Атмосфераға ену уақыты: 5 маусым, Астана уақытымен шамамен 22:40;
• Нысан: LandSpace компаниясы 17 мамырда ұшырған Zhuque-2 Enhanced зымыранының сатысы;
• Ерекшелігі: Экологиялық таза отын (сұйық метан мен оттегі) пайдаланылады, жану кезінде айқын жарық шығарады.

Бұл нысан уақыт жағынан және көрініс сипаттамасы бойынша Қазақстан тұрғындары байқаған құбылысқа ең дәл сәйкес келеді.

2. STARLINK-1631 (SpaceX) спутнигі

• Атмосфераға ену уақыты: 6 маусым, Алматы уақытымен 03:41;
• Ескі спутниктердің бірінің жоспарлы орбитадан шығуы.

3. Жапондық H-2A R/B зымыранының үдеткіш блогы

• Атмосфераға ену уақыты: 6 маусым, Алматы уақытымен 00:36;
• Нысан пассивті орбитадан шығу режимінде болған.

Қазіргі таңда Қазақстан Республикасы аумағына қандай да бір фрагменттердің құлағаны немесе залал келтіргені туралы расталған ақпарат жоқ. Мұндай нысандар, әдетте, атмосферада толық жанып кетеді (ірі бөліктердің Қазақстан аумағына құлауы екіталай), ал құбылыстың өзі көрнекі болғанымен, қауіпсіз үдеріс болып саналады.

Азаматтардан сабыр сақтап, тек ресми ақпарат көздеріне сенуді сұраймыз", — делінген министрлік таратқан хабарламада.

Айта кетейік, бұған дейін Астана мен еліміздің өзге да қалаларының тұрғындары аспандағы беймәлім нысандарды байқаған еді.

Бұған қатысты Қорғаныс министрлігінің өкілдері мәлімдеме жасап, Қазақстан аумағында әуе кеңістігінің бұзылу фактілері тіркелмеген жеткізді.