Түркістан облысындағы «Балауса» жазғы лагерінде 1 маусым – Халықаралық балаларды қорғау күніне орай «Қазақстан балалары» атты мерекелік іс-шара өтті. Табиғаты әсем, балаларға барлық жағдай жасалған демалыс аймағында 10 бағыт бойынша түрлі іс-шаралар мен сайыстар ұйымдастырылды.

Шараға облыс әкімі Нұралхан Көшеров пен Полиция департаменті бастығының орынбасары Бағланбек Айтпаев қатысты. Олар балаларды төл мерекелерімен құттықтап, оқу үлгерімі мен өзге де салаларда жетістікке жеткен оқушыларға алғыс хаттар, сертификаттар пен сыйлықтар табыс етті.

Ал Түркістан облысының полицейлері балаларға жолда өзін қалай дұрыс ұстау, жазғы демалыс кезіндегі қауіпсіздікті сақтау, суға түсу ережелері мен пайдалы кеңестер берді.

Сонымен қатар балаларға қауіпсіздік ережелерін еске салатын жаднамалар таратылды. Балалар мен ата-аналар үшін бұл шара қызықты әрі пайдалы болды, ал полицейлердің қатысуы балалардың қауіпсіздікке деген жауапкершілігін арттыруға зор үлес қосты.

Сондай-ақ, Халықаралық балаларды қорғау күніне орай Төлеби аудандық полиция бөлімі отбасылық үлгідегі балалар үйінің тәрбиеленушілері үшін полиция қызметіне арналған арнайы көрме ұйымдастырды. Іс-шараның басты мақсаты – балалардың құқықтық сауаттылығын арттырып, полиция қызметінің маңыздылығын насихаттау, сондай-ақ жас ұрпақтың тәртіп сақшыларына деген сенімін нығайту болды.

Көрме аясында балалар тәртіп сақшылары қолданатын арнайы техникалармен, құрал-жабдықтармен, сондай-ақ нысанды киім үлгілерімен танысты. Тәрбиеленушілерге әрбір жабдықтың қызметі мен қолданыс ерекшеліктері түсіндіріліп, полиция қызметкерлерінің күнделікті жұмысы жайлы қызықты ақпараттар ұсынылды.

Полиция бөлімінің бастығы Ғалымжан Қуашбаев балаларды мерекелерімен құттықтап, жүрекжарды тілегін жеткізді. Сонымен қатар ол көрмені жеке таныстырып, балалардың сауалдарына жауап берді.

Шара соңында тәрбиеленушілер өз өнерлерін ортаға салып, концерттік бағдарлама ұсынды. Балалардың шынайы күлкісі мен қуанышты сәттері бұл кездесудің басты жетістігіне айналды. Полиция бөлімінің бастамасы – балалардың жүрегіне сенім ұялатып, болашаққа деген үмітін арттыру жолындағы игі қадам ретінде бағаланды.