Бүгін Халықаралық балаларды қорғау күніне орай еліміздің барлық өңірінен келген оқушылар Ақордада қонақ болды.

Президент резиденциясына оқу үздіктері, пән олимпиадаларының, республикалық және халықаралық байқаулардың жеңімпаздары, спорт сайыстарының жүлдегерлері, батыл әрекетімен көзге түскен балалар келді. Ақорданың кішкентай қонақтарының қатарында көпбалалы отбасылардан шыққан, ата-анасының қамқорлығынсыз қалған және ерекше қажеттілігі бар жеткіншектер де болды, деп хабарлады Ақ Орда телеграм арнасы.

Экскурсия кезінде оқушылар Ақорданың орталық салтанатты холы мен ресми қабылдаулар өткізуге арналған залдарды, Мемлекет басшысының кітапханасын, сондай-ақ резиденция аумағындағы бақты аралады.

Экскурсоводтар балаларға қызықты фактілер жайында мәлімет берді.

Сонымен қатар оқушыларға Президент атынан естелік сыйлықтар табысталды.

Төтенше жағдайлар министрлігінің мәліметі бойынша елімізде соңғы 4 жылда 843 адам суға ағып кеткен. Оның 260-ы бала. Ал тек биыл 60 бала терезеден құлап кетіп, олардың бесеуі мерт болған. 55 бала түрлі дәрежедегі жарақатпен ауруханаға түскен.

Мұны неге айтып тұрмыз? Халықаралық бала қорғау күнінде ғана емес, әрдайым балаға қарайық. Денсаулығына, қауіпсіздігіне, тәрбиесіне. Сосын тегін тарататын балмұздақ, тәтті-пәттіге таласып, ұрыс шығармайықшы...