Ішкі бағыттағы рейстерге мемлекет тарапынан субсидия бөлінеді.

Жаз айларында қазақстандықтар ел ішіндегі демалыс орындарына арзан рейспен қатынай алады. Бұл туралы туризм және спорт министрлігі туризм индустриясы комитеті төрағасының міндетін атқарушы Нұрбол Байжанов мәлімдеді, деп жазады inbusiness.kz сайты.

Нұрбол Байжановтың сөзінше, көлік министрлігімен тиісті келісімшарттар жасалып қойған. Сәуір айында бекітілген құжатқа сәйкес, сұраныс жоғары әлеуметтік бағыттарға мемлекет тарапынан қолдау көрсетіледі.

Субсидиялаудың нәтижесінде маусым, шілде, тамыз айларында Астана мен Алматыдан қатынайтын рейстерге төмендегі тарифтер бекітілді:

• Астана – Балқаш 16 000 теңге;
• Астана – Үржар 18 000 теңге;
• Астана – Үшарал 20 000 теңге.

Алматыдан қатынайтын рейстер үшін де дәл осы бағалар сақталады.

Ресми субсидияланатын рейстерден бөлек, демалыс аймақтарына коммерциялық чартерлік рейстер де ұйымдастырылмақ. Қазір бұл мәселе туристік операторлармен пысықталып жатыр.