Атырау облысы Құлсары қаласындағы жанармай құю бекетінде жарылыс болып, жақын орналасқан үйлер өртке оранды. ТЖД 14 адамның зардап шеккені және екі адамның көз жұмғаны туралы хабарлады , деп жазады KAZ.NUR.KZ.

Оқиға туралы толығырақ KAZ.NUR.KZ тілшісіне облыстық ТЖД департаментіне сілтеме жасаған Атырау облыстық әкімдігі айтып берді.

"Атырау облыстық 112 пультіне Жылыой ауданы Құлсары қаласындағы Махамбет Өтемісұлы даңғылының бойында газ-ауа қоспасы жарылып, артынша жақын маңда орналасқан үш бір қабатты ғимарат пен арт жақтағы екі қабатты ғимарат өртке оранғаны туралы ақпарат түскен.

Оқиға орнына шұғыл түрде ТЖД және мемлекеттік емес өртке қарсы қызметтердің 60 адамы және 10 бірлік техникасы түріндегі күштер мен құралдар келіп жеткен.

Өрт-құтқару бөлімшелері қазіргі таңда өрт сөндіруді жалғастырып жатыр. Сондай-ақ өрт ошақтарын анықтап, қауіпті аймақтан адамдарды қауіпсіз жерге көшіру жұмыстары жүргізіліп жатыр.

Алдын ала дерек бойынша 14 адам зардап шегіп, 2 адам көз жұмған. Өрт ауданы және себебі анықталыып жатыр", — делінген Атырау облыстық ТЖД хабарламасында.