Премьер-министр мен БҰҰ Бас хатшысының орынбасары Хаолян Шу орнықты даму мақсаттарын жүзеге асырудағы ынтымақ жайын талқылады . Жалпы БҰҰ-мен әріптестік орнатқалы елде түрлі салада 200 жоба іске асты. Ал қазір 35 жоба бойынша жұмыс жүріп жатыр. Бұлар: денсаулық сақтау саласын цифрлық трансформациялау, әлеуметтік қорғау бағдарламаларының тиімділігі мен қолжетімділігін арттыру.

Сондай-ақ тиімді энергия үшін инвесторларға жағдай жасау, ауыл шаруашылығы өндірісін ілгерілету мен адам құқықтарын қорғаудың ұлттық тетіктері бар. Президент Қасым-Жомарт Тоқаев Біріккен Ұлттар Ұйымымен әріптестікті нығайтуға үлкен мән береді. «Мемлекет басшысы мен БҰҰ Бас хатшысы Антониу Гутерриш арасындағы өзара конструктивті қатынас бірлескен бастамаларды ілгерілетуге қосымша серпін беріп отыр», – деді Премьер-министр. Қазақстан климаттық проблемаларды шешуді де толық қолдайды. Олжас Бектенов көміртегі бейтараптығы бойынша стратегияда төмен көміртекті экономикаға көшуге әлеует берілгенін жеткізді.