Алматыдағы Президент Іс басқармасы Медицина орталығы Ұлттық госпиталь қабырғасында X Халықаралық дискуссиялық нейрокурс өтіп жатыр. Екі күн бойы Қазақстан мен шетелден келген жетекші нейрохирургтар, невролог, нейрорадиологтар тәжірибе алмасып, шеберлік сабақтарына қатысады.

Қазір елдегі нейрохирургия саласында айтарлықтай жетістіктер бар. Отандық дәрігерлер әлемдік тәжірибедегі жоғары технологиялық операцияларды жасап жүр. Тіпті заманауи әдіспен жасалатын операциялар аудан орталықтарында қолжетімді. Бүгінгі жиынға күрделі операциядан өтіп, сауыққан пациенттер де шақырылды. Білікті мамандар нақты клиникалық жағдайларды талқылап, сондай-ақ нейрохирургияда жасанды интеллектті қолдану мәселелерін ортаға салды.

Мыңжылқы Бердіқожаев, Ұлттық госпитальдің нейрохирургия бөлімінің меңгерушісі:

- Курстың ерекшелігі – біз бұл жолы бас ауруы, бастың сақинасы, мидың тамырларының, оның ішінде қан тамырлардың тарылуы жөнінде сөз қозғаймыз. Мидың ісіктеріне көп көңіл бөлдік. Сонымен қатар эпилепсия ауруы жөнінде жеке бөлім болады.

Марат Саршаев Ұлттық госпиталь нейрохирургия бөлімшесінің меңгерушісі:

- Осы нейрокурстың аясында біз ауруханада тікелей шеберлік сағаттарын өткіземіз. Олар екі түрлі операциядан екі әдіспен: эндоваскулярлы, яғни тамырдың іші арқылы және мидың ішіне эндоскопиялық тәсілмен кіріп жасалынатын отаны көрсетеміз.