Түркістан облысында су тапшылығы екі есеге азайды. Өңірде енгізілген су үнемдеу технологияларының арқасында осы нәтижеге қол жеткізілді.

Бұл жөнінде облыс әкімі брифингте айтты. Елімізде жыл сайын су тапшылығы сезіліп отырғандықтан Мемлекет басшысы суды үнемдейтін озық технологияларды жедел енгізуді тапсырған болатын. Мамандардың айтуынша, жаңа жүйелер егіннің өнімділігін үш есе арттыруға мүмкіндік береді. Түркістан облысы – елдегі суармалы жерлердің төрттен біріне ие өңір. Биыл су үнемдеу технологиялары енгізілген алқап көлемі 114 мың гектарға жетті. Алдағы бес жылда бұл көрсеткішті тағы екі есеге арттыру жоспарлануда. Суару технологияларын қолжетімді ету үшін өңірде алты кәсіпорын ашу жоспарланған. Қазір олардың төртеуі жұмыс істеп тұр, ал қалған екеуі келесі жылы іске қосылмақ.

Нұралхан Көшеров, Түркістан облысының әкімі:

- Нәтижесінде жылына 198 мың гектарға су үнемдер технология қамтамасыз ету мүмкіндігі пайда болады. Алдағы уақытта осы кәсіпорындар есебінен су үнемдеу технологияларымен облыс және көршілес өңірлер толық қамтамасыз етіледі.