Эстония бізге не береді, біз эстондарға не ұсына аламыз деген сұрақ туады, әрине. Жыл басынан бері екі елдің тауар айналымы 46 миллион долларға жетті. Эстонияға жіберілген экспорт көлемі 20,2 млн доллар. Басым бөлігі қайта өңдеу және ауыл шаруашылығы салаларына тиесілі.

Экспорттың 22%-ке жуығы – жалпы сомасы 4,4 млн доллар көлеміндегі ағаш шпоны. Сонымен қатар 4,2 млн доллар өсімдік майларынан алынатын қалдықтар, 3 млн доллардан астам рапс тұқымдары тасымалданды. Фанера экспорты 2,6 млн доллар, титан және одан жасалған бұйымдар 1,7 млн доллар. Одан бөлек, 1,2 млн долларға зығыр тұқымы сыртқа шығарылды.

Ал Қазақстанға импортталған тауар сомасы 25,8 миллион долларға жетті. Сырттан әкелген өнімдер қатарында азық-түлік пен өнеркәсіпке арналған жабдықтар басым. Елге жеткізілген тауарлардың көлемі бойынша мұздатылған балық көш басында. Оның құны 4,1 млн доллар, бұл жалпы импорттың шамамен 16%-ін құрайды. Сондай-ақ 3,6 млн долларға газ және сұйықтық сүзгілері мен 3 млн долларға телефон құрылғылары кірген.

Бұдан бөлек, Эстониядан елге жүк тасымалына арналған теміржол, трамвай вагондары, подшипниктер және дәрі жеткізіледі.