Қарағандыда полиция бөлімшесінен ес-түссіз табылған тәртіп сақшысы бір айдан аса ауруханада жатып, сауығып шықты. Шыға салысымен жұмыстан қуылған. Бұған қоса, қасынан 23 жастағы әйелдің өлі табылуына байланысты қозғалған іс бойынша тергеуге алынбақ, — деп хабарлайды Massaget.kz тілшісі ktk.kz-ке сілтеме жасап.

Мұның алдында Қарағанды ішкі істер басқармасы мен облыстық полиция департаментінің бірқатар лауазымды тұлғасы тәртіптік жауапкершілікке тартылған болатын. Бәрі қатаң сөгіс алды. Өйткені полицей мен әйел есірткіден уланған деген болжам бар. Кейін екеуі ол жерге бір күн бұрын келгені белгілі болды. Осы аралықта полицейді басшылықтан ешкім іздемеген. Бұл жайт ауданның полиция бөліміндегі талай былықты ашқан сыңайлы. Сондықтан бастығы бірден қызметімен қош айтысты.

Еске салайық, 1 қазанда кешке полиция бөлімшесінен учаскелік инспектор ес-түссіз күйде табылды. Сол бөлмеде 23 жастағы әйелдің өлі денесі де жатқан. 38 жастағы полицей мен марқұм әйел үнемі сол жерде кездесіп жүріпті.

"Әйелдің мәйітінің табылуына байланысты соталды тергеу жалғасып жатыр. Бұрынғы учаскелік полиция инспекторы ауруханадан шығып, сонымен қатар, ішкі істер органдарынан жұмыстан шығарылды. Өзге ақпарат тергеу мүддесіне сәйкес жарияланбайды", — деді Қарағанды облысы ПД баспасөз хатшысы Бақытжан Құдияров.

Instagram парақшамызға жазылып, ең қызықты ақпараттарды бірінші болып оқыңыз!