Президент Қасым-Жомарт Тоқаев Ресейге барады.

Мемлекеттік сапар аясында «Солтүстік-Оңтүстік» халықаралық көлік дәлізін дамыту, өзара сауда айналымы, инвестициялық жобалар сынды өзекті мәселелер талқыланады. Бірқатар маңызды құжатқа қол қою көзделіп отыр. Кездесуде құрлықтағы ең ұзын шекараға ие қос мемлекет арасындағы ынтымақтастықты одан әрі нығайта түсу жайы сөз болмақ.

Сөйтіп, қазір көрші елдегі дайындық қалай? Сарапшылар не дейді?

Ресей мәртебелі мейманды барынша сән-салтанатымен қарсы алу үшін қызу дайындалып жатыр. Президент Қасым-Жомарт Тоқаев бұл жолы көрші елге мемлекеттік сапармен барады. Оның аясында қос елдің мемлекет басшылары арасында келіссөздер мен ресми кездесулер өткізу жоспарланған. Сапар Қазақстан мен Ресейдің стратегиялық серіктестігі мен одақтастық қатынастарына тың серпін бермек.

Сергей Лавров, Ресей Федерациясының Сыртқы істер министрі:

- Қазақстан Республикасының Президенті Қасым-Жомарт Тоқаевтың мемлекеттік сапарына дайындық қарқынды жүріп жатыр. Бұл шын мәнінде халықаралық деңгейдегі оқиға десем артық айтқаным емес. Бүгінде елдеріміз мемлекеттің әр саласында нақты әрі екі жаққа да тиімді ынтымақтастық орнатқан.

Мемлекет басшысы алдағы кездесуді екіжақты ынтымақтастыққа зор оң әсер ететін маңызды оқиға деп атады. Басқосу кезінде тараптар талқыға салатын басты мәселелердің бірі «Солтүстік-Оңтүстік» халықаралық көлік дәлізін дамыту. Бұл магистраль Еуропаны Ресей, Қазақстан, Әзербайжан, Түрікменстан жерлері арқылы Иран және Парсы шығанағымен жалғап жатыр. Өткен жылдың қорытындыларына жүгінсек, былтыр біздің республика арқылы өткен жүк ағыны 2,5 млн тоннаға жуықтады. 2027 жылға қарай бұл бағыттың өткізу қабілетін екі есе арттыру көзделіп отыр. Осы және өзге де сұрақтарды екі ел Президенттері кейінгі бір айда телефон арқылы 3 рет талқылады. Жалпы биыл Қасым-Жомарт Тоқаев пен Владмир Путин төрт рет кездесті. «Осының өзі екі ел арасындағы стратегиялық байланыстың қаншалықты берік екенін көрсетеді» — дейді сарапшылар.

Дмитрий Новиков, Ресей ғылым академиясы Қытай және қазіргі Азия институты Орталық Азияны зерттеу орталығының жетекшісі:

- Әлемдегі көптеген көршілес мемлекеттер арасында мұндай байланыс жоқ. Америка мен Канаданы, Ұлыбритания мен Еуроодақты, Қытайдың кейбір көршілерімен арақатынасын мысал ретінде келтірсе болады. Олардың сауда айналымы жоғары, географиялық жағынан жақын болғанымен, қарым-қатынастары шиеленіске толы. Ал Ресей мен Қазақстанның жағдайы бөлек. Президенттеріміз де, халықтарымыз да тығыз байланыста.

Биыл қазан айында Қазақстан мен Ресей арасындағы дипломатиялық байланыстың орнағанына 33 жыл толды. Ресей біздің экономикаға қаржы құйып отырған негізгі инвесторлардың бірі. Өткен жылдың өзінде елімізге 4 миллиард доллар инвестиция салды. Жалпы құны 22 миллиард долларға жуық 114 жобаның іске асырылды. Бұл бағыттағы жұмыс әлі де жалғасады.

Динара Орынтай, Мөлдір Жақан, Наргиз Мукатаева