4 қараша күні Алматыда алғашқы қар жауды. Кенеттен түскен ақ ұлпа қала тұрғындарын әбігерге салды, ал коммуналдық қызметтер тәулік бойы жұмыс істеді, деп хабарлайды Egemen.kz.

Ауа температурасы +2 °C шамасында болса, желдің жылдамдығы 2-7 м/с аралығында болды. Қардың қалыңдығы қала аумағында шамамен 1 сантиметрге жетсе, таулы аймақтарда ол 10 сантиметрге дейін түскен.

Қала көшелерін қардан тазарту және көктайғақтың алдын алу мақсатында коммуналдық қызметтер күшейтілген режимде жұмысқа кірісті. Түнгі уақытта қала жолдарына 918 арнайы техника мен 2 550-ден астам жол жұмысшысы шықты. Негізгі магистральдар, көпірлер, жол айрықтары, еңістер мен тротуарлар көктайғаққа қарсы материалдармен өңделіп жатыр.

Қар түспей тұрып, 204 құм-тұз шашқыш техника магистральдарды алдын ала сұйық реагенттермен өңдеген. Қазір жолдарға арнайы қоспалар себіліп, аялдамалар мен жаяу жүргіншілер өткелдері тазартылып жатыр.

Қалалық әкімдіктің мәліметінше, көшелердегі жағдайды бақылау және мұз қатқан аймақтарда жедел әрекет ету үшін 75 патрульдік бригада кезекшілікте тұр. Қажет болған жағдайда қосымша 1000-ға дейін техника мен 6110 жол жұмысшысы жұмылдырылмақ.

Бұл ретте такси қызметінің бағасы да күрт өскен.

Алматы тұрғындары әлеуметтік желілерде қар басқан көшелер мен көлік кептелістері туралы бейнежазбалармен бөлісіп, қаладағы қыстың алғашқы әсерлерін талқылап жатыр.