Қазақстанда шығарылған электротехникалық өнімдер шетелге экспортталып жатыр .
Мысалы, қосалқы трансформатор жиынтығы мен электр энергиясын тарату қондырғысына сұраныс жоғары. Қазірдің өзінде отандық компаниялар Қырғызстан, Өзбекстан мен Тәжікстан сияқты мемлекеттердің нарығын бағындырды.
Бұл кәсіпорын жоғары вольтты ұяшықтар мен қосалқы трансформаторды өндіруге маманданған. Жыл басынан бері өнім көлемі екі миллиард теңгеге жуықтады. Осылайша былтыр бір жылда жеткен табысқа биыл жеті айда жетіп отыр. Электротехникалық өнімдерді еліміздің түкпір –түкпіріне жеткізіп береді. Оған қоса биыл экспортқа бет бұрды. Қазірдің өзінде Қырғызстанға алғашқы туарларын жөнелтті.
Ғалымжан Жексембиев, кәсіпорынның бас директоры:
- Біз толығымен отандық өндірушілерміз. Жергілікті шикізатты қолданамыз. Технология да өзіміздікі. Яғни 70 пайыздан астамын өзіміз қамтып отырмыз. Тауарды шетелге шығаруды Қырғызстан мен Тәжікстаннан бастадық.
Холдингте 2 мыңға тарта адам еңбек етеді. Мұнда жұмысшылардың біліктілігі ерекше бағаланады. Өйткені тауардың сапасы соларға байланысты. «Биыл Президент тапсырмасымен «Жұмысшы мамандықтары жылы»,- деп белгіленді. Бұл дегеніңіз біз сияқты еңбек адамына көрсетілген құрмет»-дейді Ержігіт Әбдіманат. Ол 5 жыл бұрын зауытқа темір шебері болып орналасқан. Қазір қаңылтыр бүгетін станокта оператор. Бар білгенін өзінен кейін келген жастарға үйретіп жүр.
Ержігіт Әбдіманат, зауыт операторы:
- Жұмысқа алған кезде слесарь қылып аламыз. Өйткені слесарьлар бүкіл майда-шүйде жұмыстарын істейді. Сол жерден бәрін үйренеді.
Кәсіпорынға әлі де жұмысшы мамандар қажет. Осыған орай университеттермен, колледждермен ынтымақтастық орнатқан. Студенттер тәжірибеден өтуге келеді. Шаруаға икемді, бейімі барлары осында қалады.
Ғалымжан Жексембиев, кәсіпорынның бас директоры:
- Өндіріске тәжірибеден өтуге келгендерді тартамыз. Олардың әрқайсысына тәлімгер бекітіледі. Содан кейін нақты істе көрсетіп, дағдысын қалыптастырамыз. Оқу орындарында көбіне теорияны үйретеді ғой. Ал өндірісте мүлдем бөлек. Әрине оңай емес. Бірақ жауапкершілігі зор, жұмысты тыңғылықты істейтін жастар бар. Бізге дәл сондай мамандар керек. Барынша жағдай жасаймыз деп айта аламын.
Қазіргі уақытта компания өндірістік кәсіпорынды жаңартып жатыр. Бұл өнім көлемін ұлғайтуға, қосымша жұмыс орындарын ашуға және экспорт бағытын кеңейтуге мүмкіндік береді.
Қарлығаш Қайыпбекова , Мұхит Құдықбаев, 24kz
