Алматыда «Батыр» президенттік полкі қатарындағы мерзімді әскери қызмет сарбаздары ант берді, деп хабарлайды 24kz.

28 гвардияшы-панфиловшылар саябағында өткен салтанатты шараға Мемлекеттік күзет қызметінің офицерлері мен жас сарбаздардың ата-аналары, жақындары қатысты. Еліміздің барлық аймақтарынан іріктеліп алынған сарбаздар әскери бөлімдердің далалық оқу орталықтарында дайындық курсынан өтті. Отан алдындағы борышын Мемлекеттік күзет қызметі қатарында атқару жас сарбаздар үшін абырой, әрі мықты тәжірибе мектебі. Салтанатты шарада элиталы әскери бөлім сарбаздары жауынгерлік өнерлерін көрсетті.

Асылжан Марат, қатардағы жауынгер:

-Бүгін біз үшін маңызды күн. Біз Қазақстан Республикасына адал қызмет етуге ант еттік. Әскери ант бұл – жай ғана сөз емес, бұл – Отан алдындағы қасиетті борыш және үлкен жауапкершілік. Енді біздің әрбір қадамымыз, әрбір іс-әрекетіміз еліміздің тыныштығы мен халқымыздың амандығы үшін болады.

Темірлан Нұғымаров, ҚР Мемлекеттік күзет қызметінің аға лейтенанты:

- Бір жыл бойы бізде жауынгерлік және арнайы дайындық сабақтары, мемлекеттік құқықтық дайындық сабақтары, саптық дайындық, әскери медициналық көмек көрсету сабақтары жүзеге асырылады. Бір жыл бойы сарбаздармен жүйелі түрде тәрбиелік жұмыстар жүргізіледі.