Оңтүстік өңірлерде орым науқаны басталды .

Елдің солтүстігіндегі диқандар да ішінара орақ салды. Дегенмен, жаппай жиым-терім тамыздың екінші жартысынан бастап жүргізіледі. Комбайынын қомдап, қамбасын сайлап отырған өңірлердің бірі Ақмола облысы. Жауаптылар күзгі далалық жұмыстарға 15 мыңға жуық техника дайындап отыр. Шаруалардың тыныс-тіршілігі қалай?

Шернияз Жалғасбекұлы, тілші:

- Ақмола облысына аяқ бастық. Аймақ аграрлық әлеуетімен әйгілі. Биыл мұндағы диқандар 5,3 млн гектар жерге егін екті. Енді бір аптаның бедерінде орым басталады. Қамба қаншалықты толады? Шаруалардың қам қарекеті қалай? Бүгін осы жайлы айтамыз.

Тамыздың түгесілер тұсы. Бұл кезең егістің көрініп, шаруалардың ала жаздай еткен еңбегі таразыға түсетін шақ. Былтыр ақмолалық дихандар егістік алқаптарынан бас-аяғы 6,6 млн астық алған еді. Биыл бұл межені асыра орындауға бейіл.

Ренат Қасенов, Ақмола облысының ауыл шаруашылығы және жер қатынастары басқармасы басшысының орынбасары:

- Дәнді, дәнді бұршақ текті дақылдар 4,7 млн гектарға орналасты. Майлы дақылдар 495 мың гектарға орналасты. Былтырғы жылмен салыстырғалы 268 мың гектарға басым. Биылғы ауа райының қолайлығына байланысты, агротехникалық процестердің дәл уақытында жасалғанына байланысты биыл дәнді дақылдардың 80 пайызы жақсы, майлы дақылдардың 77 пайызы жақсы.

Дәнді бұршақты дақылдар — 4,7 млн га

Майлы дақылдар — 495,4 мың га

Картоп — 8,7 мың га

Көкөніс — 1,4 мың га

Шаруалардың еккенін шашау шығармай жинап алу үшін тың техника керек. Айтайық, аймақта 15 мыңға жуық агро машина бар. Оның тең жартысы тозып тұр. Дегенмен, құзырлылар қолқусырып отырған жоқ. Жыл басынан бері 734 жаңа техника сатып алынды. Мәселен, егінші Қуантай Сұлтанов шаруашылығындағы автопаркті 90 пайызға жаңартты.

Агротехника – 15 мың дана

Тозу деңгейі – 50%

Сатып алынды – 734 дана

Қуантай Сұлтанов, егінші:

- 132 мың гектар жер бар. Соның 91 мың гектарына егін себеміз. 15-інен былай қарай орақты бастаймыз. Былтыр гектарына 30-33-тен алдық. Ал биыл 23-тен аламыз деп олаймыз. Былтырғы ауа райы мен биылғы ауа райы сәйкес келмей тұр. Былтыр жаңбыр шашым көп болып, биыл бас кезінде жаңбыр болмай, енді енді жаңбыр болып жатыр.

Орым уақытында дизель отыны да қат болатыны бар. Мұндайда мемлекет мезірет танытуға бейіл. Жауаптылардан жеңілдетілген жанар-жағармайдың жай-жапсарын сұраған еді. Тапшылықтың алдын алып, бағаны бақылауда ұстаймыз дейді олар.

Бақыт Ілиясов, ҚР АШМ Техникалық жабдықтау басқарамасының басшысы:

- Ақмола облысына 86 мың егістік орақ и 85 мың көктемгі дала жұмыстарына Жеңілдетілген дизель отыны бөлінді. Толық қамтамасыз етіп жатыр қазір, шаруалар дизель отынын алып жатыр. Заправкада дизель отынының бағасы 315 теңге, біз шаруаларға беріп жатырмыз қазір 274 теңгемен. Айырмашылық 20 пайызға дейін жетеді жеңілдетілген. Бұл үкімет тарапынан көмек.

Дер кезінде берілген қаржы да дәтке қуат. Былтырдан бастап жеңілдетілген несие желтоқсан айында берілді. Яғни, шаруалар қажетті қаржысына ерте қол жеткізді. Мұның маңыздылығын былтырғы агро форумда мемлекет басшысы да баса айтқан еді.

Ренат Қасенов, Ақмола облысының ауыл шаруашылығы және жер қатынастары басқармасы басшысының орынбасары:

- Кең дала 1-2 бағдарламасы бойынша 116 млрд теңге ақша бөлінді және лизинг техникасын алуға 24 млрд теңге ақша бөлінді. Инвестициялық жобаларға биылғы 17 млрд теңге ақша бөлінді.

Сондай-ақ жергілікті билік астықты сақтауға да, сатуға да болысуға міндетті. Осы мақсатта аймақта 66 қойма қызмет көрсетеді. Бұл нысандар бас-аяғы 7 млн тонна өнімді қабылдауға қауқарлы.

Шернияз Жалғасбекұлы, Артур Горшняков