Ұлы Абайдың 180 жылдық мерейтойын күллі қазақ елі тойлап жатыр. Ақтөбеде ақынның әндері қоғамдық көліктерде қойылып, жолаушылар өздері білетін шығармаларды қосыла шырқады. Тағылымы мол шаралар тек облыс орталығында ғана емес, аудан, ауылдарда да өтуде.

Жақсыбек Кемал, тілші:

Абай әндері үш бағыттағы жолаушылар автобустарына қосылған. Оны жұртшылық жылы қабылдап жатыр. Кейбіреуі тіпті, өздері білетін әндерді қосыла шырқап отыр.

Абай әндері бірнеше күннен бері автобустарда үздіксіз қосылып тұр. Ақын шығармалары алдын ала таспаланып, жүргізушілерге таратылған. Жолаушылар бұл жаңалықты қуана қабылдап жатқандарын айтады.

Ақжүніс Сарбалина, қала тұрғыны:

Айтамыз, тыңдаймыз. Абайдың әні керемет қой. Абайдың «Желсіз түнде жарық ай», «Жарқ етпес қара көңілім» әндері классика.

Облыс орталығындағы саябақта ерекше форматтағы караоке кеші өтті. Абайдың әндері шырқалып, жас та, жасамыс та ақынға деген шынайы құрметін білдірді. Шараға облыс әкімінің орынбасары мен басқарма басшылары да қатысып, көрмермендермен бірге өздерінің сүйікті шығармаларын жатқа оқыды.

Жолдас Батырхан, облыс әкімінің орынбасары:

Жыл басынан бері 2 мыңға жуық облыс көлемінде шаралар өткен екен. Хакім Абайды ұлықтау – ұлтты ұлықтау. Осы бағытта дананың мерейтойы қарсаңында әсіресе, облыс орталығында іргелі шаралар өтуде.

Абайдың 180 жылдық мерейтойы аудандарда да тойланып жатыр. Ал Бадамша ауылында ақынның муралы пайда болды.

Жақсыбек Кемал