Қызылордада күріштің көлемін қысқартып, оның орнына суды аса көп қажет етпейтін дақылдарды өсіруге басымдық берілді. Бұған қоса, 8 мың 100 гектар алқапқа су үнемдеу үшін жаңа қондырғылар орнатылған. Премьер-министрдің орынбасары Қанат Бозымбаев Қызылорда облысына арнайы барып, диқандармен кездесті.

Климаттық ахуалды ескерген Қазалы ауданындағы шаруашылық тіршілік нәрін тиімді тұтынуға көшкен. Екі жылдан бері жаңбырлатып суару әдісімен 260 гектар алқапқа жүгері өсіріп жатыр.

Дастан Садықов, агроном:

Алда 40–50 градус ыстық келе жатыр, 50 мм су құю керек деп өзі ескертіп тұрады. Автоматты түрде қосылып, қажетті 50 мм суды құяды. 50 күн ішінде 2 метрлік жерде 20 см-лік америкалық бану сортын өсірдік.

Үкімет басшысының орынбасары Қанат Бозымбаев өңірдегі «Басықара» су торабының, сондай-ақ Қармақшы ауданындағы алма бағын көрді.

Орынбасар Төлепов, шаруашылық төрағасы:

Бұл 5 гектар жерге 8600 түп егілген. Негізгі жоспарымыз – осы алма бақты дұрыс өсіріп, көбейтіп, кейін көкөніс сақтайтын қойма салу.

Өңірдегі диқандар биыл 80 мың гектардан астам жерге күріш екті. Шаруалар егінжай күйіп кетпес үшін қашыртқыдағы суды қайта пайдалануда.

Қанат Бозымбаев, ҚР Премьер-министрінің орынбасары:

Екі апта ішінде 600 миллионнан астам текше метр су Түркістан облысына жеткізіледі. Секундына 350 текше метр суды транзитпен Қызылорда облысына жіберіп отырамыз. Қажет болса, осы деңгейде ұстаймыз.

Бұған қоса, Үкімет резервінен 1 млрд теңге қаржы бөлініп, 53 жылжымалы дизельді сорғы станциясы сатып алынбақ. Бұл 6 мың гектардан астам жерді суаруға мүмкіндік береді.

Қозы Көрпеш Жасаралұлы