Елімізде ауыл шаруашылығы алқаптарын шегірткеге қарсы химиялық өңдеу жұмыстары аяқталды. Бұл туралы Орталық коммуникациялар қызметінде өткен брифингте сала министрлігіне қарасты аграрлық-өнеркәсіптік кешенінің (АӨК) мемлекеттік инспекция комитеті төрағасының орынбасары Саят Сақмолдин мәлім қылды, деп жазады Egemen.kz.

«Шегірткеге қарсы уақытылы және сапалы күрес шараларын ұйымдастыру – елдің азық-түлік қауіпсіздігін қамтамасыз етудегі басым бағыттардың бірі. Биыл үйірлі шегірткелерге қарсы 2,7 млн гектар аумақта қорғау шаралары жүргізілді. Бұл өткен жылмен салыстырғанда 400 мың гектарға аз. Бүгінде барлық өңірлерде өңдеу толық аяқталды», деді спикер.

Мониторинг тиімділігін арттыру мақсатында зерттеулерге 4625 маман жұмылдырылған, бұл 2024 жылдан екі есе көп. Сондай-ақ әзірленген Жол картасы жүзеге асырылды.

Жалпы 443 арнайы техника, соның ішінде 24 жеңіл авиация ұшағы, 31 аса жеңіл авиация техникасы, 49 агродрон пайдаланылған.

Өңдеу барысында қолданылған барлық препараттар жоғары биологиялық тиімділікке ие әрі қауіпсіздік талаптарына сәйкес болған.

Ресей, Өзбекстан, Қырғызстан және Қытаймен бірлескен зерттеулер, онлайн-кеңестер және шегірткенің таралуы бойынша деректер алмасу тұрақты түрде жүргізіліп отырды.

Шара қорытындысы бойынша ауыл шаруашылығы дақылдарының зақымдануына, сондай-ақ шегірткенің көрші мемлекеттердің шекаралас аумақтарына көшуіне жол берілмеген.