Рыбакина плей-оффқа шықты. Канаданың Монреал қаласында теннистен WTA 1000 санатындағы турнир өтіп жатыр.

Қазақстандық Елена Рыбакина үшінші айналымда румыниялық Жаклин Кристианды жеңді. Енді украниналық Даяна Ястремскаямен жолығып, ширек финал жолдамасын сарапқа салады.

«Астана» жеңді, «Ақтөбе» жеңілді

«Астана» жеңді, «Ақтөбе» жеңілді. Қазақстандық командалар УЕФА Конференциялар лигасы аясындағы кезекті кездесулерін өткізді. Әсіресе, «Астана» үшін өте сәтті ойын болды. Олар Молдова астанасы Кишинев қаласында жергілікті «Зимбрумен» жолыққан болатын. «Астана» ойыншылары ә дегеннен басымдықты өз қолдарына алып, қарсыластар қапасына қос доп соқты. 18-минутта Джеффри Чинеду, ал 21-ші минутта Усман Камара мергендігімен көзге түсті және бұл нәтиже матч соңына дейін өзгермеді. Қорытынды есеп: 0:2. Ал Астанада өткен алғашқы ойын 1:1 есебімен аяқталған болатын. Сәйкесінше, қос ойын қорытындысы бойынша 3:1 есебімен қазақсандық клуб жеңіске жетті және жарысты жалғастыруға мүмкіндік алды. Енді «Астана» УЕФА Конференциялар лигасының үшінші кезеңінде Швейцарияның «Лозанна» командасымен кездеседі. Матчтар 7-тамызда Лозаннада, 14-тамызда Астанада болады. Ал «Ақтөбе» «Спартаны» жеңе алмады. Қазақстандық және чехиялық клубтар да УЕФА Конференция лигасы екінші айналымында кездескен болатын. Прага қаласында өткен матчта алаң иелері ірі есеппен жеңіске жетті. 4:0. «Ақтөбе» қанша тырысқанымен, есеп айырмасын қысқарта алмады. Айта кету керек, Қазақстанда өткен алғашқы ойында 2:1 есебі тіркелген еді. Сонымен, қос ойын қорытындысы бойынша 5:2 есебімен «Спарта» алға шықты және сенімді түрде келесі кезеңге өтті. Ал «Ақтөбе» үшін еурокубоктардағы биылғы жарыс осымен аяқталды.

Футболдан әуесқойлар лигасы

«Мұнайтелеком» мен «Жұмыссапар» финалда кездеседі. Елімізде футболдан әуесқойлар лигасы жалғасып жатыр. Оның аясында қарапайым жұмысшы адамдар, әсіресе, футболды жақсы көретін және футболға жаны ашитын адамдар командаларға бірігіп, 11/11 форматында өзара мықтыны анықтайды. Алдымен аймақтық деңгейде, одан кейін республикалық деңгейде жарыстар өтеді. Жеңімпаз атанғаны кәсіпқойлар арасында Қазақстан чемпионатына және Қазақстан кубогына қатысуға мүмкіндік алады. Қазір өңірлік іріктеулер жүріп жатыр. Мәселен, Маңғыстау облысында осындай 20 команда тіркеліп, 2 ай бойы кездесулер сериясын өткізді. Топтық кезең болды. Плей-офф болды. Нәтижесінде финалға жоғарыда айтқан командалар шығып отыр. Жеңіске жеткені күзде өтетін республикалық жарысқа қатысады.

Мадхия Усманова – әлем чемпионы

Мадхия Усманова – әлем чемпионы. Грекия астанасы Афина қаласында күрес түрлерінен жасөспірімдер арасындағы яғни, 17 жасқа дейінгілер арасындағы дүниежүзілік дода өтіп жатыр. Жарыстың кезекті күні қыздар бозкілемге шықты. Әсіресе, 57 келіде қазақстандық Мадхия Усманова барлық қарсыласын жеңіп, алтын жүлдегер атанды. Ол финалда үндістандық Мони Мониден басым түсті. Айта кету керек, бұл біз үшін ұзақ күткен медаль. Өйткені, жасөспірімдер арасында қазақ қыздары тек 2013 жылы ғана алтын жеңіп алған болатын. Ол кезде Эльмира Әбілқайырова әлем чемпионы атанды. Енді, міне араға 12 жыл салып Мадхия Усманова жеңіс жолын жалғады. Бұған қоса, қоржынымыда қола жүлде бар. Оны 43 келідегі Інжу Баққожа жеңіп алды. Әйелдер күресі бойынша жарыстар бүгін де жалғасады. Сәйкесінше, чемпиондарымыздың қатары артуы мүмкін. Афина қаласындағы дүниежүзілік доданың жалпы қорытындысы 4-тамызда белгілі болады.

Азия чемпионаты бүгін кімдер жұдырықытасады?

Бүгін 8 боксшымыз жұдырықтасады. Тайланд астанасы Бангкок қаласында жасөспірімдер мен жастар арасындағы Азия чемпионаты басталды. Бұл — World Boxing ұйымының 19 және 22 жасқа дейінгілер арасындағы алғашқы құрлықтық жарысы. Оған 26 елден 400-ге жуық спортшы қатысады. Бүгін — алғашқы жарыс күні. Ең бірінші болып 19 жасқа дейінгілер шаршы алаңға шығады. Ұлттық құрама сапынан Диана Серікбаева кореялық, Айым Таңқыбаева вьетнамдық, Жанель Имантаева өзбекстандық және Аяжан Ермек жапониялық қыздармен кездеседі. Ал, ұлдар арасынан Әділ Асқанбай кореялық, Бейбарыс Әшірбаев түркіменстандық, Тимур Тайбеков сингапурлық және Бексұлтан Қайратұлы өзбекстандық спортшылармен қолғап түйістіреді. Жалпы қос жас деңгейін қосып алатын болсақ, бас-аяғы 39 боксшымыз ел намысын қорғайды. Тайландтағы Азия чемпионаты 11 тамызға дейін жалғасады.