Шерзат Полаттың өліміне қатысты сот отырысы кезінде куәгер Алдияр Махмет пен күдікті Шынасыл Абзалдың беттестіру кезіндегі әңгіме көрсетілді.

Куәгер Ахметті соққыға кім жыққанын айтып берді , — деп хабарлайды Caravan.kz медиа порталы.

Болған оқиғаның куәгері Алдияр Махметтің айтуынша, бірнеше жасөспірім мен ересек азаматтар арасында қақтығыс туындаған. Оқиға «Қамажай» дүкенінің маңында болған.

Алдиярдың сөзінше, ол Нұрдәулет, Ахмет және Мирас есімді достарымен бірге аталған дүкенге барған. Дүкен алдында Нұрғанат есімді азамат және белгісіз екі ер адам тұрған. Біраз уақыттан кейін Accent маркалы автокөлік келіп, ішінен үш жігіт түскен. Сол сәтте жастар камераға түсіп қалмау үшін шеткі жерге барып тұрған.

Кейін Mercedes Benz W140 көлігі келіп тоқтап, ішінен Абзал есімді азамат және тағы бірнеше жігіт түскен. Абзал «Қайсысың менің бауырыма қол көтердің?» деп сұраған. Жастар мұндай әрекетке бармағанын айтып жауап берген.

Ахмет Нұрғанатты нұсқап, «Ағасы сол жерде тұр, сонымен сөйлес» дегенде, Абзал кенеттен Ахметке жұдырық жұмсап, ол есінен танып құлаған. Нұрғанат оны көтеріп жатқан кезде, Абзал оның да желке тұсынан екі рет ұрған. Нұрғанат та жерге құлап, содан кейін бірнеше адам оны тепкілей бастаған.

Оқиғаның жалғасуында үш жігіт қолына пышақ алып, жәбірленушілерді қуалап кеткен. Алдиярдың айтуынша, олар 50 метрге дейін қашып, көрші көшемен жасырынып үлгерген.