Мәжіліс депутаттары сенаторлардың жаңа Салық кодексіне, сондай-ақ, салық салу туралы заң жобасына енгізген түзетулерімен келісті. Енді құжат Президенттің қол қоюына жіберіледі, — деп хабарлайды Massaget.kz тілшісі.

23 маусымда сенаторлар жаңа Салық кодексі жобасын қарады. Олар құжаттың кейбір тармақтарымен келіспей, оны Мәжіліске қайта өңдеуге жіберді. Олар мынадай өзгерістерді ұсынды:

• Шаруа қожалықтары: табысы 230 000 АЕК-тен асатын (2025 жылы шамамен 900 миллион теңге) фермерлерге 4,5 пайыз көлемінде салық салынады. Бұрын олар салық төлемейтін;
• Биржалар бойынша: KASE-де құнды қағаздардан түскен табыс жеке табыс салығына жатпайды, бұл қазақстандық және халықаралық биржалар арасындағы теңгерімсіздікті болдырмау үшін жасалды;
• Төлем карталары бойынша: карталар арқылы жасалған операциялар ҚҚС-тан босатылады, бұл комиссиялар өсуіне және төлемдермен байланысты қиындықтарға жол бермеу үшін қажет;
• Сән-салтанат салығы: қымбат көліктерге (75 миллион теңгеден жоғары), яхталар мен ұшақтарға акциз салығы салынады, олар ел ішінде сатып алынған болса да;
• Мүгедектігі бар адамдар: осындай 10 адам жұмыс істейтін компаниялар ҚҚС-тан босатылады;
• Газеттер мен журналдар: отандық баспа басылымдары үшін ҚҚС мөлшерлемесі 10 пайыз болады.

Бүгін Парламентте жаңа Салық кодексі қабылданды, енді ол Президенттің қол қоюына жіберіледі.

Егер Президент қол қойса, құжат 2026 жылғы 1 қаңтардан бастап күшіне енеді.

Қызықты жаңалықтар мен видеоларды көру үшін TikTok арнамызға жазылыңыз!