Ресей басшысы Владимир Путин АҚШ-тың Иранға жасаған соққысын ақтап алуға келмейтін агрессия деп атады.

Бұл туралы ол Кремльде өткен Иран сыртқы істер министрі Аббас Аракчимен кездесуде мәлімдеді. Ресей президенті Мәскеу мен Тегеран арасында ежелден бері қалыптасқан берік ынтысмақтастық бар екенін атап өтіп, осыған байланысты Ресей тарапы Иран халқына қолдау көрсету үшін күш салып жатқанын айтты.

Владимир Путин, Ресей Президенті:

- Біздің осы оқиғаларға қатысты ұстанымымыз бәріне белгілі. Біріккен Ұлттар Ұйымының Қауіпсіздік кеңесінде біз ұстанған позицияны да білесіздер. Иранға жасалған агрессияның еш негізі жоқ. Оны ақтап алуға да келмейді.

Ал Иран сыртқы істер министрі Путинге Израиль мен АҚШ-тың әрекеттерін батыл айыптағаны үшін алғыс білдірді. Сонымен қатар Таяу Шығыстағы қақтығыстың ушығуына АҚШ пен Израильдің Иранның ядролық нысандарына қатысты әрекеттері себеп болып отырғанын айтты.