AQMOLA индустриялық аймағына 1,1 трлн теңге инвестиция тартылды, деп хабарлайды 24kz.

Аумақтан арысы Сингапур, берісі Түркия, Қытай сынды алпауыт елдердің инвесторлары, жаңа өндіріс орындарын ашуға құлықты. Әзірге 7 жоба жоспарланып отыр. Ойдағыдай орындалса, 5000 жұмыс орнын құруға, мүмкіндік береді. Астықты өңірді өркендетуге бағытталған бастаманың бүгін салтанатты ашылуы өтіп, кап-суласы қаланды.

Астана іргесіндегі бұл аумақта бірер жылда қарбалас тірлік басталады. Бидайды терең өңдейтін өндірістік кешен, бетон шығаратын зауыт, ауыл шаруашылығы техникаларын жасайтын өндіріс орнындары ашылмақ. Істі ілгерілетуге 7 жоба арнайы таңдап алыныпты. Жұмысқа білек сыбана кірісуге құлықты инвесторлар Сингапур, Қытай, Түркия мен өзімізідің елден. Қазіргі таңда мұнда жалпы көлемі 1,1 трлн теңгеден асатын қаржы құйылды.

Талғат Ләззатұлы, «Eagle Architecture Technology Co., LTD» компаниясының өкілі:

- Үш түрлі зауытты қолға алып жатырмыз. Газоблоктар, алюминий есік-терезе, құрылыс материалдары. Құны жалпы 6,5 млрд теңгелік инвестиция тартылған. 100-ден 130 адамға дейін жұмыспен қамтылады.

Индустриялық аймақ ауданы 1 мың гектарға жуық. Аумақтың елордаға іргелес орналасуы да бекер емес. Жоспарланған жобалар бас қала мен өңір дамуына ерекше серпін береді деп күтіліп отыр. Бастама сәтімен іске асса, жергілікті жердегі 4,5 мыңнан адам жұмыспен қамтылады.

Марат Ахметжанов, Ақмола облысының әкімі:

- Бұл жерді біз 300 гектардан бастап едік, қазіргі таңда мына жер 870 гектар. Қосымша тағы 130 гектар жер беріп жатырмыз. Осылай бұны ұлғайтамыз. Өйткені осылай өңірге керек экономикамыздың дамуына, тұрақты жұмыс орындарын жасауға керек қожалықтарды тартамыз. Бүгінгі таңда бұның өзі 7 инвестордың өзі 1 трлннан астам инвестиция құйып отыр.

Астықты аймақ агроөнеркәсіп кешенін дамытуға тағы да күш салады. Қоянды мен Көкшетау қаласында екі индустриялық аймақ жұмысын бастайды.