Жамбыл облысында былғары аяқ киім шығаратын цех ашылды. Жеңіл өнеркәсіп саласын дамытуға қылмыстық атқару жүйесі департаментінің №25 түзеу мекемесіндегі жазасын өтеп жатқандар үлес қоспақ. Осылайша облыстық прокуратураның қолдауымен сотталғандарды тұрақты жұмыспен қамтудың тағы бір жобасы жүзеге асты.

Тараздағы №25 түзеу мекемесінде жұмыс қызу. Темірден түйін түйіп, ағашты иіп, бұйым жасағандар енді былғары аяқ киім шығарады. Жеке кәсіпкер Бауыржан Теңізбаев 90 млн теңге қаржыға 500 шаршы метрден асатын шағын фабрика ашты.

Бауыржан Теңізбаев, жеке кәсіпкер:

Қазіргі сәтте 25 адам жұмыс істеп жатыр. Ал болашақта 50-60 адам екі тәулікте жұмыс істейді. Тәулігіне 500-600 жұп аяқ киім шығаруға мүмкіндігіміз бар.

Цехтағы сотталғандардың айлығы 85 мыңнан 200 мың теңгеге дейін. Яғни, олар түрмеде отырып табыс тауып, жалақысын жақындарына жібере алады. Жұмыс істеу арқылы жазасын да жеңілдетуге мүмкіндік бар.

Жәнібек Қосжанов, облыстық Қылмыстық атқару жүйесі департаментінің бастығы:

Талапкердің үлесіне қатысты өздерінің шығындарын өтейді. Одан кейін мерзімінен бұрын босауға, мүмкіндіктері мерзімдерінің үштен бір бөлігін өтегеннен кейін бостандығын шектеу немесе қауіпсіздігі барынша төмен мекемеге ауыстыруға болады. Сондай-ақ екінші мүмкіндік екіден бір бөлігін өтегеннен кейін шартты түрде мерзімінен бұрын босап шығу бойынша мүмкіндік бар.

Осылайша облыстық прокуратура сотталғандарды қолдау арқылы әлеуметтік ортаға қайта бейімдеудің тиімді жүйесін жүзеге асырмақ. Айта кетейік, аймақтағы 5 түзеу мекемесінде мыңға жуық жазасын өтеуші жұмыспен қамтылған.

Данияр Әлімқұл